Germaniianyń batysyna soqqan «Bernd» tsiklonynan týyndaǵan kúshti nóser 19 adamnyń ómirin qidy. Taǵy 60-qa jýyq adam habar-osharsyz ketken. Bul týraly DW habarlady.
Germaniiada qatty nóser saldarynan Reinland-Pfalts federaldy jeriniń Arvailer aimaǵynda alty úi qulady. Taǵy birneshe ǵimarattyń qulaý qaýpi bar.
Germaniianyń batysyndaǵy túrli aýdandarda apattan 19 adam kóz jumyp, 60-qa jýyq adam habar-osharsyz ketti. Sý tasqyny Rein jáne salalarynyń jaǵasyndaǵy kóptegen qalalarda oryn aldy.
Adamdardy qutqarý úshin tikushaqtar tartyldy. Arvailer aimaǵynda úzdiksiz nóser men sý tasqynynyń saldarynan tótenshe jaǵdai jariialandy. Jergilikti ákimshilik adamdardy múmkindiginshe úide bolýǵa jáne qajet bolǵan jaǵdaida joǵarǵy qabattarǵa kóshýge shaqyrdy.
Výppertal politsiiasynyń habarlaýynsha, nóser kezinde 82 jastaǵy er adam úiiniń sý basqan jertólesine túsip ketken. Qaiǵyly oqiǵa Zolingen qalasynda oryn alǵan. Zeinetker aýrýhanaǵa jetkizilgenimen, ómirin saqtap qalý múmkin bolmady.
Soltústik Rein-Vestfaliia federaldy jerindegi Merkisher-Krais aimaǵynda 46 jáne 52 jastaǵy eki órt sóndirýshi qaitys boldy. Kelnniń sý basqan jertólelerinde órt sóndirýshiler eki adamnyń máiitin tapty. Arvailer aýdanynda tórt adam sý tasqynynyń qurbany boldy. Oiskirhen okrýginiń biligi beisenbide segiz adamnyń qaza tapqany týraly habarlady. Ýnna okrýginde taǵy bir adam sýǵa batyp ketti.
Qatty jańbyr men sý tasqyny elektr qýatyn óshirip, sondai-aq Reinland-Pfalts, Soltústik Rein-Vestfaliia jáne Saardyń kóptegen bólikterinde aýyz sýdyń toqtap qalýyna sebep boldy. Aifel taýlarynda ornalasqan eldi mekenderde barlyq mektep jabyldy.
Germaniianyń negizgi temirjol operatory Deutsche Bahn kontserni jolaýshylarǵa jaqyn kúnderi Soltústik Rein – Vestfaliiaǵa jáne osy federaldy jerden tys jerlerge barýdan bas tartýǵa shaqyrdy, óitkeni onyń aýmaǵyndaǵy kóptegen temirjol ýchaskeleri sý astynda qalyp, poiyz qozǵalysyna jaramsyz bolyp qalǵan.
Soltústik Rein – Vestfaliia federaldy jeriniń premer-ministri, Germaniia kantsleri laýazymyna kandidat Armin Lashet (Armin Laschet) sý tasqynynan qatty zardap shekken Hagen qalasyna barýǵa nietti.
