Germaniiadaǵy parlament sailaýynyń nátijesi shyqty. Eń kóp daýysty Sotsial-demokrattar partiiasy aldy. Oǵan sailaýshylardyń 25,7 paiyz daýys berdi. Endi olarǵa Býndestagtaǵy 735 mandattyń 206-sy buiyrmaq.
Osyǵan deiin Býndestagta basym kúshke ie bolyp kelgen Hristian-demokratiialyq partiia men Hristian-sotsial odaǵynyń aliansy 24,1 paiyz daýyspen ekinshi oryn aldy. Bul – alians tarihyndaǵy eń tómengi kórsetkish. Qazirgi Germaniia úkimetin osy eki partiia qurap otyr. Biraq osy sailaýdan keiin bári ózgerýi múmkin.
Partiialardyń eshqaisysy basym daýys almaǵan soń, koalitsiia qurylady. Úkimettiń kimniń basqaratyny partiialardyń ózara qalai kelisetinine bailanysty. Sarapshylar eki yqtimal koalitsiiany atap otyr. Olardyń biri – Sotsial-demokrattar partiiasy, Jasyldar partiiasy jáne Erkin demokrattar partiiasy. Ekinshisi – Hristian-demokratiialyq partiia men Hristian-sotsial odaǵynyń aliansy, Jasyldar partiiasy jáne Erkin demokrattar partiiasy. Sotsial-demokrattar partiiasynyń lideri Olaf Sholtstiń kantsler bolýǵa degen múmkindigi joǵary dep baǵalanyp otyr.
Ótken merzimdegidei, bul joly da nemis parlamentiniń tómengi palatasy 6 partiiadan turmaq. Jeksenbi, 26 qyrkúiek kúni ótken sailaýda Jasyldar 14,8 paiyz nemese 118 oryn, Erkin demokrattar 11 paiyz nemese 92 oryn, "Germaniia úshin balamalar" partiiasy 10 paiyz nemese 83 oryn, "Solshyldar" 4,9 paiyz nemese 39 oryn (5 paiyzdyq mejeden aspasa da bir mandatty okrýgterdi jeńiske jetip, parlamentke ótip otyr) aldy. Bir oryn Ońtústik Shlezvingtegi daniialyq topqa buiyrdy.
Sailaý nátijesi osydan bir kún buryn jariialanǵan ekzit-poll nátijesine sáikes keledi.
Germaniia úkimetin 16 jyl basqarǵan Angela Merkel 2018 jyldyń ózinde-aq besinshi merzimge talaspaitynyn málimdegen. 67 jastaǵy saiasatker sailaý ýchaskesine barmai, daýysyn poshta arqyly berdi. Ol jańa úkimet qurylǵansha kantsler qyzmetin atqara turady. Jańa koalitsiianyń qurylýy birneshe aiǵa ulasýy yqtimal.
