Toǵyzqumalaqtan Eýropa chempionaty Shvainfýrtta (Germaniia) 23-24 shilde aralyǵynda ótti. Eýropa chempionatyna Germaniia, Frantsiia, Grekiia, Shveitsariia, Ispaniia, Resei, Chehiia jáne taǵy basqa onnan astam memleket sportshylary qatysty. Chempionat shveitsar júiesi boiynsha, erler men áielder arasynda uiymdastyryldy.
Eýropa chempionaty ashylýyna Dúniejúzilik toǵyzqumalaq federatsiiasynyń prezidenti Alihan Baimenov pen Qazaqstan Mádeniet jáne sport ministrligi Sport jáne dene shynyqtyrý isteri Komitetiniń tóraǵasy Elsiiar Qanaǵatov, Shvainfýrt meri Karl Haints Kaýchok qatysty.
«Toǵyzqumalaq - qazaqtyń dúniejúzilik mádenietke qosqan jarqyn úlesiniń biri. Chempionat - intellektýaldyq saiys, mádeni shara ǵana emes, mádeni muramyzdy nasihattaý joly. Bul – dúniejúzilik federatsiianyń qurylǵan kúninen bastap alǵa qoiǵan mindetteriniń biri», - dep atap ótti Alihan Baimenov.
Dúniejúzilik federatsiia 2009 jyldan beri toǵyzqumalaqtan úsh ret álem chempionatyn ótkizip, úshinshisine 25 el ókilderi qatysqan. Chempionattardyń ótýine otandyq kásipkerler Dinmuhammed Ydyrysov, Keńes Raqyshev, Erlan Áshim, Maqsat Ramanqulov, Erǵali Ibragimov qolǵabys tigizýde. Sońǵy jyldary memleket tarapynan da toǵyzqumalaqty damytýǵa júieli kóńil aýdarylýda. Qazirgi tańda toǵyzqumalaqpen ainalysatyn qazaqstandyqtar sany 200 myńnan asty. Alda Aziia chempionatyn uiymdastyrýǵa Qytai ókimeti óz tarapynan qoldaý kórsetýge niet bildirip otyr.
Eýropa chempionaty barysyndaǵy halyqaralyq týrnirge Qazaqstan Ulttyq qurama komandasy músheleri de qatysyp, sheteldik sportshylardyń sheberligin arttyryp, tájiribe jinaqtaýyna kómek kórsetti. Jarysqa qatysýshylar men toǵyzqumalaq áýestenýshileri – negizinen Eýropa elderinde turyp jatqan jergilikti halyq.
Chempionat aiasynda, sondai-aq, ulttyq oiyndy halyqaralyq deńgeide odan ári damytý máseleleri de keńinen talqylandy.
"Ult aqparat"
