GFR elimizdiń BUU Adam quqyqtary jónindegi keńesine múshelikke ótýine qoldaý tanytty. Bul týraly QR Syrtqy ister ministriniń orynbasary Roman Vasilenko málim etti, dep habarlaidy QazAqparat.
«Búgingi kezdesýde adam quqyqtary men bostandyqtaryn qamtamasyz etýge jáne demokratiialyq qoǵam qurýda Qazaqstandaǵy demokratiialyq reformalardyń kún tártibi talqylandy. Nemis tarapy osy saladaǵy dáiekti bastamalardy iske asyrý barysymen, onyń ishinde azamattyq qoǵamdy nyǵaitý, zań ústemdigin qamtamasyz etý jáne qańtardaǵy qaiǵyly oqiǵalardan keiin azamattardyń áleýmettik-ekonomikalyq ál-aýqatyn jaqsartý mánmátinimen tanysty. QR SIM basshylyǵy atynan Germaniiaǵa 2022-2024 jyldarǵa arnalǵan BUU Adam quqyqtary jónindegi keńesine múshelikke qazaqstandyq ótinimdi qoldaǵany úshin erekshe alǵysymdy bildirgim keledi», - dedi Roman Vasilenko ministrlikte ótken baspasóz máslihatynda.
Vitse-ministrdiń aitýynsha, Germaniia - Qazaqstannyń jetekshi syrtqy ekonomikalyq áriptesi.
Jáne Qazaqstan Ortalyq Aziia óńirindegi nemis biznesi úshin basty naryq bolyp otyr.
«Búginde Qazaqstan men GFR arasynda 35-ten astam kelisim jumys isteidi. Atalǵan kelisimderge Memleket basshysynyń 2019 jylǵy jeltoqsanda jáne 2020 jylǵy aqpanda Germaniiaǵa sapary barysynda qol jetti. Nemis investorlarymen jumys jónindegi úkimettik jumys toby, Berlin Eýraziialyq klýby jáne saýda-ekonomikalyq yntymaqtastyq jónindegi úkimetaralyq jumys toby siiaqty qazaq-german ekonomikalyq diplomatiia institýttary jemisti jumys istep jatyr», - deidi ol.
