Qazaqstandyq kásipqoi boksshy Gennadii Golovkin 5 mamyr kúni jekpe-jek ótkizetin boldy. Bul týraly vesti.kz jazdy.
Otandasymyz tegi armian amerikalyq boksshy Vanes Martirosianmen judyryqtasady. GGG jekpe-jek jaily twitter jelisindegi paraqshasynda habarlady.
Qos boksshy arasyndaǵy jekpe-jek 5 mamyr kúni Karsondaǵy (Kaliforniia shtaty, AQSh) StubHub Center arenada ótedi.
Vanes Martirosian tegi armeniialyq boksshy. Ol 4 jasqa tolǵanda otbasy AQSh-qa qonys aýdarǵan. Al bokspen 7 jasynan bastap shuǵyldana bastaǵan. Ákesiniń ózi áýesqoi boksshy bolǵan.
Áýesqoi boksta aýyz toltyryp aitarlyqtai jetistikke jetpese de, bolashaǵy zor boksshy ekenin baiqatqan. 2004 jyly Afiny Olimpiadasyna 69 kg salmaqta qatysqan. Birinshi kezdesýinde aljirlik Benamar Meskindi jeńse, ekinshi ainalymda kýbalyq Lorenso Aragonnan utylǵan. Barlyǵy 130 kezdesý ótkizip, 120-da jeńiske jetken.
2005 jyly boksshy kásipqoi boksqa aýysady. Ol kezde Vanes 20 jasta-aq edi. Al alǵashqy qurlyqtyq chempiondyq jekpe-jegin 2009 jyly ótkizgen.
Vanes Martirosian barlyq jekpe-jekterin birinshi orta salmaqta ótkizgen. 33 jekpe-jekte qatarynan jeńiske jetken. 2012 jyly kýbalyq Erislandi Laramen teń túsedi. Araǵa bir jyl sala amerikalyq boksshy Demetriýs Andradege upai aiyrmasymen jol berip, alǵash ret jeńiledi.
2015 jyly otandasy Djermell Charlodan jeńilgen. 2016 jyly kýbalyq Erislandi Laraǵa qarsy kezdesý ótkizip, upai aiyrmasymen utylǵan. Odan bergi 2 jyl ishinde sharshy alańǵa shyqpaǵan.
Aita keteiik, orta salmaqta WBC, WBA (Super), IBF jáne IBO tujyrymdary boiynsha álem chempiony ataǵyna ie otandasymyz Gennadii Golovkin 5 mamyr kúni meksikalyq boksshy Saýl Alvarespen judyryqtasýy tiis edi. Alaida "Kanelodan" doping tabylyp, jekpe-jek ótpeitin bolyp sheshilgen bolatyn.
