Niý-Iorktegi Madison Square Garden arenasynda qazaqstandyq kásipqoi boksshy Gennadii Golovkin (39-1-1, 35 KO) ýkrainalyq Sergei Derevianchenkomen (13-1, 10 KO) jekpe-jek ótkizdi, dep habarlaidy "Ult aqparat".
Boksshylar orta salmaq sanatynda IBF jáne IBO tujyrymdary boiynsha álem chempiony titýlyna talasty.
Jekpe-jektiń alǵashqy raýndynda Golovkinniń birneshe soqqysynan keiin Derevianchenko tepe-teńdigin joǵaltyp aldy. Nokdaýnnan keiin qazaqstandyq boksshynyń basymdyǵy aiqyndala tústi. Ásirese, 2-raýndta sol qolymen urǵan joiqyn soqqysynan keiin ýkrainalyqtyń oń jaq qasy jarylyp ketti. Biraq, tóreshiler aiqasty toqtatpady.
Keiingi raýndtarda Derevianchenko jaqyn qashyqtyqta júrip, seriialyq soqqylarmen upai alýǵa áreket etti. Al Golovkin qarsylasynyń ashylýyn kútip, aragidik-aragidik dál soqqylar baǵyttady.
6-7 raýndtardan bastap boksshylar birtindep ashyq aiqasqa kóshti. Ekeýi de aianyp qalǵan joq. Keiingi raýndtarda Derevianchenko keremet shapshańdyq tanytty. Tartysty aiqas 12-shi raýndqa deiin jalǵasty.
Tóreshilerdiń sheshimimen, jekpe-jek Gennadii Golovkinniń jeńisimen aiaqtaldy. Osylaisha, qazaqstandyq bylǵary qolǵap sheberi IBF jáne IBO tujyrymdarynyń beldigin qaitaryp aldy.
Álemdik BAQ taratqan málimetke sáikes, bul kezdesý úshin qazaqstandyq sportshy 15 million dollar (5 milliard 835 million teńge, 1 dollar – 389 teńge), ýkrainalyq boksshy 5,2 million dollar (2 milliard 22 million 800 myń teńge, 1 dollar – 389 teńge) alady.
