Foto: UOK
Qazaqstannyń áigili boksshysy, Olimpiada júldegeri jáne burynǵy kásipqoi álem chempiony Gennadii Golovkin Italiianyń Rim qalasynda ótken World Boxing kongresinde uiym prezidenti bolyp sailandy, dep habarlaidy Ult.kz.
Kongreste GGG uiym músheleriniń aldynda sóz sóilep, aldaǵy jumysynyń basymdyqtaryn tanystyrdy. Ol sózin bokstaǵy ómir jolynan bastady:
«Men boksqa eń kishkentai zaldan keldim. Olimpiadaǵa deiingi jáne álemdik arenalarǵa deiingi uzaq joldan óttim. Búgin men sharshy alańdaǵy sportshy retinde emes, osy sportty saqtap, damytý úshin jumys isteitin adam retinde keldim», – dedi jańa prezident.
Golovkinniń baǵdarlamasy birneshe negizgi baǵyttan turady:
1. World Boxing-ke senimdi qaitarý.
GGG halyqaralyq sport júiesinde aiqyndyq, ádildik jáne myqty basqarýdyń mańyzyn atap ótti. Ol HOK-tyń Olympism365 komissiiasynyń múshesi jáne World Boxing Olimpiadalyq komissiiasynyń tóraǵasy retinde talaptardy jaqsy túsinetinin aitty.
2. Bokstyń Olimpiadadaǵy ornyn saqtaý.
Onyń basty maqsaty – World Boxing uiymyn HOK tarapynan tolyq moiyndatý jáne boksty Olimpiada baǵdarlamasynda turaqty etý. «Bokstyń Olimpiadadaǵy orny talqylanatyn másele emes, kepil bolýy kerek», – dedi Golovkin.
3. Tórt negizgi tuǵyr:
-
sportshylardyń múddesi – basty nazarda;
-
adaldyq pen ashyqtyq;
-
innovatsiialar men tehnologiialyq damý;
-
qarjylyq turaqtylyq jáne federatsiianyń ósýi.
4. Reformalar 2026 jyldan bastalady.
Jańa jyldan keiin alǵashqy ózgerister júzege asady. Negizgi qadamdar:
-
sportshylardyń daýysyn tyńdaityn halyqaralyq Athletes’ Council qurý;
-
táýelsiz tórelik pen baqylaý júiesin engizý;
-
World Boxing Educational Academy ashý (sportshylar men bapkerlerge arnalǵan oqý, dopingke qarsy modýlder, tóreshilik kýrstary, sporttan keiingi mansapqa beiimdeý).
5. Jańa stildegi kóshbasshylyq.
«Kóshbasshylyq – adamdardyń ústinen qaraý emes, olarmen qatar turý. Birlik – uran emes, tártip», – dedi Golovkin.
Golovkinniń baǵdarlamasy uiym tarihyndaǵy eleýli reformalardyń bastamasy retinde baǵalanyp otyr. Jaqyn kúnderi ol prezident retinde resmi túrde bekitiledi.
Osyǵan bailanysty Memleket basshysy Qasym-Jomart Toqaev Gennadii Golovkindi joǵary qyzmetke sailanýymen quttyqtady.
«Bul – Gennadii Golovkinniń eren eńbegine berilgen laiyqty baǵa. Dańqty otandasymyz olimpiadalyq sport túri boiynsha halyqaralyq federatsiiany basqaratyn Qazaqstannyń alǵashqy ókili atandy», – delingen Aqorda taratqan quttyqtaýda.
