Buǵan deiin Halyqaralyq boks federatsiiasy (IBF) Gennadii Golovkindi ýkrainalyq boksshy Sergei Dervianchenkomen kezdesýge mindettegen bolatyn. Onyń promoýteri Lý DiBella da GGG-men jekpe-jek ótkizýdi talap etti, dep xabarlaidy QazAqparat tilshisi.
Sońǵy suxbatynda «DiBella Entertainment» promoýterlik kompaniiasynyń basshysy Lý DiBella qazaqstandyq boksshyǵa qarsy jekpe-jekti shegere turýǵa daiyn ekenin jetkizdi. Onyń aitýynsha, 18 sáýirde ótetin tyńdaý barysynda Saýl Alvaresti alty aidan artyq ýaqytqa shettetetin bolsa, Sergei Derevianchenkonyń komandasy Golovkinnen IBF mindettemelerin talap etýdi jalǵastyratyn bolady. GGG atalǵan uiymnyń belbeýin qorǵaýy tiis. Áitpese, bir titýldan aiyrylady.
«Endi, 5 mamyrǵa deiin eki-aq apta qaldy. Sondyqtan Golovkin Derevianchenkomen kezdespeitin shyǵar. 18 sáýirde Nevadanyń atletikalyq komissiiasy «Kaneloǵa» qatysty tyńdaýlardy ótkizedi. Sol kezde meksikalyq boksshyny aqtap, ekeýiniń rematchyn qyrkúiekke aýystyratyn bolsa, biz kúte turamyz. Derevianchenko basqa bireýmen jekpe-jek ótkize salady. Biz áý basta olardyń revanshyna qarsy bolǵan joqpyz. Al revanshty odan keiingi ýaqytqa aýystyratyn bolsa, biz jai otyra almaimyz. Biz GGG men Sergei arasyndaǵy jekpe-jektiń promoýterlik saýdasyn jáne kelissózderdi bastaýdy talap etetin bolamyz», - dedi Lý DiBella Dontae's Boxing Nation-ge bergen suxbatynda.
Aita keteiik, buǵan deiin Nevada shtatynyń atletikalyq komissiiasy Golovkinge 5 mamyrda amerikalyq boksshy Vanes Martirosianmen kezdesýge ruqsat bergen bolatyn. Oǵan WBC men WBA da kelisti. Alaida IBF qarsylyq bildirip, ýkrainalyq boksshy Sergei Derevianchenkoǵa qarsy shyǵýdy talap etken bolatyn. Endi, Golovkin men Derevianchenkonyń komandalary bir kelisimge kelse, 5 mamyrda GGG Vanes Martirosianmen (36-3-1, 21 KO) judyryqtasýy ábden múmkin.
