Qazaqstan Qarýly kúshteri áýe qorǵanysy kúshteri bas shtabynyń bastyǵy – bas qolbasshysynyń birinshi orynbasary general-maior Nurjan Muqanov qaitys boldy.
Qorǵanys ministrligi baspasóz qyzmetiniń aqparatynsha, general-maior Nurjan Nurlanuly Muqanov 16 aqpanda ómirden ótti. Ol 52 jasta bolǵan.
Qorǵanys ministrliginiń basshylyǵy men qarýly kúshterdiń jeke quramy general-maiordyń otbasyna qaiǵyryp, kóńil aitty.
"Ómiriniń kóp bóligin áskeri qyzmetke arnaǵan ol ózin daryndy basshy jáne óz isiniń kásibi mamany retinde kórsete bildi. Tabandylyǵy, kishipeiildigi men ádildiginiń arqasynda áriptesteriniń arasynda qurmetke ie boldy. Nurjan Muqanovtyń eńbegi Qazaqstan áskeriniń tarihynda máńgi óshpeidi", - delingen habarlamada.
General-maiordyń neden qaitys bolǵany habarlanbaǵan.
Nurjan Muqanov 1968 jyly 15 aqpanda Tselinograd qalasynda dúniege kelgen.
1990 jyly Dnepropetrovsk joǵary zenittik-raketalyq komandalyq áýe qorǵanysy ýchilishesin bitirdi. 2000 jyly Jýkov atyndaǵy áýe shabýylyna qarsy áskeri qorǵanys akademiiasyn támamdady.
2010 jyly Resei Federatsiiasy Qarýly kúshteri bas shtabynyń áskeri akademiiasyn bitirdi.
2011 jyly 16 aqpanda memleket basshysynyń ókimimen Qarýly kúshter áýe qorǵanysy kúshteri áýe shabýylyna qarsy qorǵanys áskerleriniń qolbasshysy bolyp taǵaiyndaldy.
2014 jyly oǵan general-maior ataǵy berildi. 2016 jyly 23 jeltoqsanda basqa jumysqa aýysýyna bailanysty qyzmetinen bosatyldy.
2016 jyly 30 jeltoqsanda qorǵanys ministriniń buiryǵymen Bas shtab bastyǵy – Qarýly kúshteri áýe qorǵanysy kúshteri bas qolbasshysynyń birinshi orynbasary bolyp taǵaiyndaldy.
