"Gazprom" 1 qazannan bastap Vengriiaǵa Ýkraina arqyly tabiǵi gaz tasymaldaýdy toqtatty. Bul jóninde "Operator GTS Ýkrainy" kompaniiasy habarlady.
1 qazannan bastap "Túrik aǵysy" men Ońtústik Shyǵys Eýropa qubyrlary arqyly gaz tasymaldaý jóninde Vengriia men Resei arasynda jasalǵan kelisim kúshine enedi. Ol 15 jylǵa jaramdy.
Ýkraina kelisim-shartty synady. "Operator GTS Ýkrainy" jetekshisi Sergei Makogon "Gazpromdy" Eýropaǵa gaz tasymaldaityn baǵyttardyń barlyǵyn monopoliialap, aimaqta gaz baǵasy sharyqtaǵan shaqta sony saiasi maqsatta paidalanyp otyr dep aiyptady. Al Kreml baspasóz hatshysy Dmitrii Peskov Resei bar bolǵany kelisim-shartta jazylǵan mindetterin oryndap jatyr jáne eshkimniń quqyǵyn buzǵan joq dep málimdedi.
Qyrkúiektiń sońynda Eýropada birjada alǵash ret bir tekshe metr gazdyń quny myń dollarǵa jetti. Jyl basynan beri gazdyń quny shamamen tórt esege ósken.
Sarapshylardyń pikirinshe, baǵanyń sharyqtaýyna 2020 jyly qystyń qatty jáne jazdyń aptap ystyq bolǵany áser etken. Eýroodaq pen Ulybritaniiadaǵy qoimalardyń tórtten úsh bóligi ǵana tolǵan. Bul - sońǵy on jyl ishindegi eń tómengi kórsetkish.
RBK-nyń jazýynsha, gaz baǵasynyń qunyna Ýkraina arqyly qosymsha gaz tasymaldaý jóninde aýktsiondar da áser etken. Onda kúnine 15 mln tekshe metr gaz saýdaǵa túsedi. Biraq "Gazprom" keminde tórt paiyzdan astamyn satyp alǵan. 20 qyrkúiekte kompaniia aýktsionda qosymsha tapsyrys bermegen.
Bul Eýroparlamenttiń reseilik "Gazpromnan" naryqqa sanaly túrde qysym jasap, monopoliia jasady dep kúdiktenýine túrtki boldy. Al reseilik kontsern tasymal kólemin ulǵaitqysy keletinin aitqan.
Máskeý "Soltústik aǵys – 2" gaz qubyry iske qosylǵannan keiin de baǵalar tepe-teńdigi saqtalatynyn alǵa tartqan. AQSh, Ýkraina jáne EO-nyń birqatar músheleri qarsy bolǵan "Soltústik aǵys – 2" jobasy salynyp bitkenmen sertifikattaý rásiminen ótpegendikten paidalanylǵan joq. Sertifikattaý protsesi 8 qyrkúiekte bastalǵan jáne tórt aiǵa sozylýy múmkin.
