Halyqtyń kópshiligi gaz ballondaryn jaqyn mańdaǵy janarmai quiý beketinen zańsyz toltyrady. Bul týraly QR Tótenshe jaǵdailar vitse-ministri Mereke Pishembaev aityp berdi, dep habarlaidy QazAqparat.
«Gazdy halyqqa satatyn kompaniialar gazdy qaita satyp qana qoimaidy, ballondardy tekserip, jóndeýdi de júzege asyrady. Ádette olar bos ballondardy toltyrylǵan ballondarǵa aiyrbastaidy. Ballondy ainalymnan shyǵarý – bul gaz kompaniiasynyń tikelei shyǵyny jáne bul kompaniialar merzimi ótken jáne aqaýly ballondardy ainalymnan shyǵarýǵa ekonomikalyq turǵydan múddeli emes», - dedi vitse-ministr Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, toltyrylǵan ballondardy tehnikalyq jaramdylyqqa tekserý týraly zańnamalyq talaptar kásipkerlerdiń eń kóp paida alý nietine qaishy keledi.
«Eski jáne merzimi ótken ballondardy paidalanatyn halyq qala mańyndaǵy eldimekenderde, aýyldyq jerlerde turady jáne negizinen az qamtamasyz etilgendikten jaǵdai kúrdelene túsedi. Qaýipsizdikke alańdaityn tutynýshylar óte az. Kópshiligi ózderiniń «keńestik» ballondaryn jaqyn mańdaǵy janarmai quiý beketinen toltyrady. Olardyń turmystyq ballondardy toltyrýǵa quqyǵy joq, alaida jappai zańsyz ispen ainalysady», - dedi Pishembaev.
Osyǵan bailanysty vitse-ministr turmystyq ballondar apaty gaz ótkizý naryǵynyń qazirgi problemalarymen tikelei bailanysty ekenin jáne turmystyq ballondardy ótkizý kezeńinde sharalar qabyldaý qajettigin aitty. Munda jalpy saiasat, gazdy ótkizý protsesine qoiylatyn talaptardy belgileý, baqylaý men monitoringti gaz jáne gazben jabdyqtaý salasyndaǵy ýákiletti organ – Energetika ministrligi júzege asyrady.
