Elimizde turmystyq gaz ballonyn avtogaz quiý beketinde toltyrý zańsyz áreket sanalady. Bul týraly QR Energetika ministrligi kómirsýtekter jáne jer qoinaýyn paidalaný salalaryndaǵy memlekettik baqylaý departamentiniń direktory Qudaibergen Arymbek málim etti, dep habarlaidy QazAqparat.
«Búginde turmystyq ballonyn avtogaz quiý beketinde toltyrý ózekti másele bolyp otyr. Aita ketý kerek, janarmai quiý beketiniń operatory maman emes. Ol gaz ballonynyń tehnikalyq jaramdylyǵyn teksermeidi. Sondai-aq, gaz ballondy toltyrý normasyn saqtai bermeidi. Munyń bári, saiyp kelgende, turmystyq gaz ballonynyń qaýipsizdigi máselesin elemeýdi bildiredi», - dedi Qudaibergen Arymbek OKQ-de ótken baspasóz máslihatynda.
Ministrlik ókiliniń aitýynsha, gaz ballonyn avtogaz quiý beketinde toltyrý - zańsyz áreket jáne ol úshin jaýapkershilik qarastyrylǵan.
«QR Ákimshilik jaýapkershilik týraly kodeksinde avtogaz janarmai quiý beketinde gaz ballondy toltyrǵany úshin aiyppul bar. Alaida, búginde atalǵan qyzmet túrine qatysty ýákiletti organǵa shaǵym men ótinish túsken joq. Jalpy janarmai quiý beketteri atalǵan áreketke paida tabý maqsatymen barady. Osyǵan bailanysty, eger siz avtogaz beketinde turmystyq gaz ballonyn toltyrý oqiǵasyna kýá bolsańyz, onda zańbuzýshylyq týraly bizdiń ministrlikke habarlasańyz bolady», - deidi ol.
