Memleket basshysy Qasym-Jomart Toqaev gaz salasyn damytý jónindegi keńeste ishki gaz naryǵyndaǵy baǵa belgileý isin jetildirýdi tapsyrdy, dep habarlaidy "Ult aqparat".
Onyń aitýynsha, óńirlerdi jappai gazben qamtamasyz etý - gaz tutyný kóleminiń artýyna ákep soǵady.
Sońǵy bes jylda ishki naryqtaǵy gaz 40 paiyzǵa, iaǵni 12 den 17 milliard tekshe metrge deiin artty.
Osy rette Qazaqstandaǵy gazdyń baǵasy TMD elderiniń ishinde eń tómengi deńgeide bolyp otyr.
– Buǵan deiin óńirler boiynsha gaz tarifyn retteý jáne halyqty qoljetimdi gazben qamtamasyz etý jóninde tapsyrma berdim. Osy baǵyttaǵy jumystardy jandandyrý kerek. Bir sózben aitqanda, halyqtyń áleýmettik jaǵdaiy tómen toptaryn, sondai-aq, jumysy gaz baǵasyna tikelei bailanysty ekonomika salalaryn júieli túrde qorǵaý maqsatymen baǵa belgileýdiń túsinikti ári jańa ashyq modeli qajet. Úkimetke 1 qyrkúiekke deiin atalǵan máseleniń ádis-tásilderin ázirleýdi tapsyramyn, – dedi Qasym-Jomart Toqaev.
Prezident gaz tasymaldaý júiesin jańǵyrtý úshin Úkimet pen «Samuryq-Qazyna» ál aýqat qoryna eksporttan, tipti, jekeshelendirýden túsetin tabysty qosa alǵanda, qosymsha qarjylandyrý kózderin iske qosýdy tapsyrdy.
