Gaz baǵasynyń ósýi onyń 2014 jyldan beri alǵash ret munaiǵa qaraǵanda qymbattaýyna ákep soqtyrdy. Bul rette tarihta gaz baǵasynyń munaiǵa qaraǵanda 2021 jyldaǵydai uzaq ýaqyt qymbat bolýy bolǵan emes, delingen Argus halyqaralyq baǵa agenttiginiń esebinde. Bul jaǵdai kei elderdi qys aldynda keibir qýat bóligin suiyq otynǵa aýystyrýǵa májbúrlegen. Bul úrdis salqyn qys jaǵdaiynda kúsheiýi múmkin, dep habarlaidy QazAqparat TASS agenttigine silteme jasap.
Soltústik-Shyǵys Aziiada gaz baǵasy munai paritetinen (munaidyń shartty barreli) biylǵy jyldy shilde aiynda kóterilgen.
Sońǵy ret mundai jaǵdai 2014 jyldyń qysynda bolǵan, dep atap ótti Argus.
Alaida sol kezde gazdyń baǵasy munaiǵa qaraǵanda qańtar-aqpan ailarynda 37 kún boiy joǵary bolyp turǵan.
«Biyl bul jaǵdai 62 kúnge jalǵasty» delingen esepte.
«Baǵa osyndai deńgeide qalsa, jylý jáne elektr generatsiialaý kásiporyndary ekologiialyq kún tártibine qaramastan, gazdyń ornyna tek kómir emes, mazýt jaǵýdy da tańdaidy», - dep jazdy sarapshylar.
Olar sonymen qatar álemde suiyq otyndy tehnikalyq qoldana alatyn stansalar kóp emes ekenin atap ótti.
