Aqtóbede qarjy piramidasy isi boiynsha sot protsesi janjalmen bastaldy, - dep habarlaidy Tengrinews.kz tilshisi Aibat aqparattyq qyzmetine silteme jasap.
Sot protsesi sottalýshylar shaǵymynan bastaldy. Birneshe adam aiyptaý aktisin kórmegenin jáne sapasyna bailanysty oqý múmkin bolmaǵanyn aitty. Oǵan prokýrorlar aiyptaý qujaty kólemdi bolýyna bailanysty "qaǵaz shyǵaratyn barlyq qurylǵy isten shyqqanyn" aitty.
Aiyptalýshy tarapta - 48 adam, onyń 31-i qamaýda, taǵy altaýyna halyqaralyq izdeý jariialanǵan. Sottalýshylar UQT jáne qarjy piramidalaryn qurdy, zańsyz biznes pen alaiaqtyq jasady dep aiyptalǵan. Olar salym salǵan adamdarǵa úlken syiaqy alasyz dep ýáde bergen. Sondai-aq, qazaqstandyqtardan páter men kólikterdi naryqtaǵy baǵadan joǵary baǵamen satyp alyp, aqshasyn bólip tólegen.
Alaiaqtyq áshkere bolǵannan keiin "Garant 24 Lombard" basshysy Aslan Myrzabekov qashyp ketti. Biraq keiin Moldovada ustaldy. Al "Vygodnyi zaim" kompaniiasynyń quryltaishysy Janbolat Esirkepov Reseimen shekarada tutqyndalǵan.
"Garant 24 Lombard", "Vygodnyi zaim", "Estate Lombard" jáne "Nýr-Ali Kapital" kompaniialarynyń qyzmetkerlerine qatysty qylmystyq is 3700 tomnan turady. Zardap shekkender - 17 000 adam. Shyǵyn somasy - 30 milliard teńge. Protsess barysynda sottalýshynyń bári birdei aiyptaý aktisin almaǵany belgili boldy. Al qujatty alǵandar ony oqi almaǵan. Olar sýdiaǵa qujat kishi áriptermen jazylǵanyn jáne anyq kórinbeitinin aityp shaǵymdandy.
"Men qol qoidym, bizge 2-3 adamǵa bir aiyptaý aktisi berildi", - dedi sottalýshylardyń biri.
Sapasyz jumys jasady dep aiyptalǵan prokýrorlar bárin joqqa shyǵarady. Olardyń aitýynsha, aiyptaý aktisi ár sottalýshyǵa berilgen jáne qujat kólemdi bolǵandyqtan "barlyq printer isten shyqqan". Taǵy bir sottalýshy aktini basqa tilde alǵanyn aityp shaǵymdandy.
Sondai-aq, protsess barysynda aiyptalýshylardyń biri aýyryp, oǵan dárigerler shaqyrylǵan.
"Men qatty aýyryp, qazir qyzýym kóterilip tur. Tańerteń meni munda májbúrlep ákeldi. Olar meniń ótinishime jaýap bermedi. Qazir jedel járdem shaqyrdy, ol keldi. Qurmetti sot, maǵan shyǵýǵa ruqsat etińiz", - dedi sottalýshy.
Aqparattyq qyzmet málimeti boiynsha, protsess uzaqqa sozylady. Prokýrorlar aiyptaý aktisin oqýdy bastaǵan, onda myńnan asa bet bar.
