Jyl basynan beri Ishki ister organdary qarjy piramidalaryn uiymdastyrý men qurý boiynsha 217 qylmystyq isti tergep, 116 isti sotqa joldady, dep habarlaidy QazAqparat.
QR IIM Tergeý departamentiniń basshysy Sanjar Ádilovtyń aitýynsha, jalpy sany 79 kúdikti jaýapqa tartylýda. IIM Tergeý departamenti túrli qarjy piramidalaryna qatysty 13 qylmystyq isti tergep jatyr.
«Máselen, «Garant 24 Lombard», «EЅTATE Lombard» jáne «Tiimdi qaryz» JShS boiynsha jábirlenýshilerden 17 myńnan astam shaǵym kelip tústi. 22 mlrd teńgeden astam somaǵa materialdyq zalal kelgeni anyqtaldy. Atalǵan uiymdardyń basshylaryna qatysty 32 qylmystyq is tirkeldi, 51 kúdikti qylmystyq jaýapqa tartylýda, 7 kúdiktige izdeý salyndy», - dedi S. Ádilov ministrliktiń onlain brifinginde.
Spiker qarjy piramidalary týraly qylmystyq isterdi tergeý aiasynda Qazaqstannan tys jerlerde de kúdiktilerdi ustaý sharalary júrgizilgenin atap ótti.
«Ulttyq gvardiianyń arnaiy borty Moldova Respýblikasynan, Resei jáne Qyrǵyzstan Respýblikasynan úsh kúdiktini jetkizdi. Qazirgi ýaqytta tergeý sharalary júrip jatyr», - dedi departament basshysy.
Kúdiktilerden 70 mln teńgeden astam aqsha tárkilengen. Tergeý amaldaryn júrgizý barysynda IIM jedel-tergeý toby 2 mlrd teńgeden astam somaǵa kúdiktilerdiń múlkin anyqtady jáne tárkiledi.
«Qylmystyq isterdi tergeý tájiribesi kórsetkendei, qarjy piramidalary – tez baiyp ketýdi qalaityn, joǵary tabysty ýáde etetin agressivti jarnamaǵa qarsy tura almaityn azamattarymyzdyń «soqyr» seniminiń nátijesi. Biz turaqty túrde BAQ arqyly halyqqa qarjy piramidalarynyń qylmystyq isteri týraly túsindirý jumystaryn júrgizemiz, biraq bul – jetkiliksiz. Mundai aýqymdy jumysty múddeli memlekettik organdar – Ulttyq bank, Qarjy ministrligi, Aqparat jáne qoǵamdyq damý ministrligi de júrgizip jatyr», - dedi Sanjar Ádilov.
