Túrkistandaǵy Qoja Ahmet Iasaýi kesenesinde Qazaq qurylys jáne sáýlet ǵylymi-zertteý institýtynyń ǵalymdary zertteý, saraptaý jumystaryn júrgizýde.
QR Mádeniet jáne sport ministrliginiń uiymdastyrýymen qolǵa alynǵan sharalar kesene kúmbeziniń tehnikalyq jaǵdaiyn saraptaýdan ótkizip, nysannyń qurylys jaǵdaiyna baqylaý júrgizý bolmaq, dep habarlaidy "Ult aqparat".
Ǵalymdar sonymen qatar keseneniń múmkindiginshe taza qalpynda saqtalýynyń joldaryn qarastyrmaq. Búginde atalǵan institýt ǵalymdary men arnaiy mamandardan quralǵan sarapshylar toby kesene irgetasynan bastap kúmbezge deiin saraptaý jumystaryn júrgizip jatyr.
«Ǵalymdar men mamandar Qoja Ahmet Iasaýi kesenesiniń qurylys materialdarynyń jaramdylyǵy men tózimdiligin, túrli ishki jáne syrtqy áserlerdiń saldarynan kelgen ziiandy jáne jumys júrgizilýi tiis aimaqtardy anyqtap, óz usynystaryn daiarlaidy. Ázirge anyqtalǵany keseneniń irgetasy berik, óz qalpyn myqty saqtap tur. Bul baǵytta júrgizilgen restavratsiia jumystary da óziniń oń nátijesin bergen. Al, qurylys ǵimaratynyń qabyrǵalary men túrli bólikteriniń seismikaǵa, ózge de jaǵdailarǵa tózimdiligin arnaiy qurylǵylar arqyly anyqtaý ústindemiz. Alynǵan taldamaýlardyń naqty sheshimi Almaty qalasyndaǵy ortalyqta ǵalymdardyń basqosýynan keiin qabyldanyp, nátijesi belgili bolady. Keseneniń qurylys tózimdiligi týraly qazir aitý erte»,- deidi Qazaq qurylys jáne sáýlet ǵylymi-zertteý institýtynyń ókili Syrymbek Erjanov.
Aita keteiik, sońǵy kezde Qoja Ahmet Iasaýi kesenesin kútip-saqtaýǵa baǵytynda túrli sharalar atqarylyp keledi. Byltyrǵy jyly IýNESKO Halyqaralyq uiymynyń mamandary da keseneniń qurylys jaǵdaiyna taldaý júrgizgen bolatyn. Biyl da álem murajailarynda myńnan astam tarihi jáne mádeni, ejelgi qoldanbaly óner eskertkishteri qalpyna keltirilgeni belgili. Al, «Qazqaitajańartý» kásipornynyń direktory Qanat Tuiaqbaev bul jumystar áli de jalǵasa beretinin aitady. Aldaǵy ýaqytta kesenege ziiandy áser beretin jer terbelisi, túrli silkinisterdiń kórsetkishin baqylaityn qurylǵylar Qazaq qurylys jáne sáýlet ǵylymi-zertteý jáne jobalaý institýty arqyly da baqylanatyn bolady.
