Mamandar Kaspii teńizinde itbalyqtardyń qyrylýyna naqty ne sebep bolǵanyn anyqtai almaǵan. Balyq sharýashylyǵy komiteti tóraǵasynyń orynbasary Aian Bahiianovtyń sózinshe, janýarlardyń óleksesi ydyrap ketken, dep habarlaidy Ulysmedia.kz.
«Ǵylymi uiymdar zertteý júrgizgenimen, itbalyqtardyń naqty neden qyrylǵany anyqtalmady. Tek janama sebepter bar. Mamandar itbalyqtar sáýir-mamyr ailarynda emes, qańtar-aqpanda ólgen dep qorytyndy shyǵardy. Taǵy bir boljam, ol – qys mezgiliniń óte jyly bolýy. Iaǵni, atalǵan sý janýarlary muzdyń ústine kúshikteidi. Al biyl jyly aýa raiy bolyp, muz erip ketti. Sondyqtan kúshikter sýǵa túsken. Al jańa týǵan itbalyqtardyń terisinde sýdan qorǵaityn qabyrshyq bolmaidy. Búginde 220 ólekse tabyldy. Sonyń 50 paiyzy jańa týǵan itbalyqtar», - dedi Bahiianov.
Sondai-aq, komitet tóraǵasynyń orynbasary tabylǵan ólekselerdiń dene músherinde qoldan jasalǵan jaraqattar baryn aitty.
«Tabylǵan birneshe itbalyqtyń basy jáne ózge de músheleri qasaqana kesip alynǵan. Bizdiń boljam boiynsha janýarlar zańsyz balyq aýlaý quraldardaryna túsken. Al brakonerler óz qylmysyn jasyrý úshin itbalyqtardyń basyn kesip tastaǵan», - dedi ol.
Eske sala keteiik, Qasym-Jomart Toqaev Ortalyq Aziia ekologiialyq zertteýler institýtyna barǵanda Kaspii itbalyǵynyń azaiyp ketý sebebin zerdelep, osy baǵytta irgeli zertteýler júrgizý qajettigin aitqan edi. Prezident osy ózekti máseleni óz baqylaýyna alatynyn aitty.
