ماماندار كاسپيي تەڭٸزٸندە يتبالىقتاردىڭ قىرىلۋىنا ناقتى نە سەبەپ بولعانىن انىقتاي الماعان. بالىق شارۋاشىلىعى كوميتەتٸ تٶراعاسىنىڭ ورىنباسارى ايان باحييانوۆتىڭ سٶزٸنشە, جانۋارلاردىڭ ٶلەكسەسٸ ىدىراپ كەتكەن, دەپ حابارلايدى Ulysmedia.kz.
«عىلىمي ۇيىمدار زەرتتەۋ جٷرگٸزگەنٸمەن, يتبالىقتاردىڭ ناقتى نەدەن قىرىلعانى انىقتالمادى. تەك جاناما سەبەپتەر بار. ماماندار يتبالىقتار سەۋٸر-مامىر ايلارىندا ەمەس, قاڭتار-اقپاندا ٶلگەن دەپ قورىتىندى شىعاردى. تاعى بٸر بولجام, ول – قىس مەزگٸلٸنٸڭ ٶتە جىلى بولۋى. ياعني, اتالعان سۋ جانۋارلارى مۇزدىڭ ٷستٸنە كٷشٸكتەيدٸ. ال بيىل جىلى اۋا رايى بولىپ, مۇز ەرٸپ كەتتٸ. سوندىقتان كٷشٸكتەر سۋعا تٷسكەن. ال جاڭا تۋعان يتبالىقتاردىڭ تەرٸسٸندە سۋدان قورعايتىن قابىرشىق بولمايدى. بٷگٸندە 220 ٶلەكسە تابىلدى. سونىڭ 50 پايىزى جاڭا تۋعان يتبالىقتار», - دەدٸ باحييانوۆ.
سونداي-اق, كوميتەت تٶراعاسىنىڭ ورىنباسارى تابىلعان ٶلەكسەلەردٸڭ دەنە مٷشەرٸندە قولدان جاسالعان جاراقاتتار بارىن ايتتى.
«تابىلعان بٸرنەشە يتبالىقتىڭ باسى جەنە ٶزگە دە مٷشەلەرٸ قاساقانا كەسٸپ الىنعان. بٸزدٸڭ بولجام بويىنشا جانۋارلار زاڭسىز بالىق اۋلاۋ قۇرالداردارىنا تٷسكەن. ال براكونەرلەر ٶز قىلمىسىن جاسىرۋ ٷشٸن يتبالىقتاردىڭ باسىن كەسٸپ تاستاعان», - دەدٸ ول.
ەسكە سالا كەتەيٸك, قاسىم-جومارت توقاەۆ ورتالىق ازييا ەكولوگييالىق زەرتتەۋلەر ينستيتۋتىنا بارعاندا كاسپيي يتبالىعىنىڭ ازايىپ كەتۋ سەبەبٸن زەردەلەپ, وسى باعىتتا ٸرگەلٸ زەرتتەۋلەر جٷرگٸزۋ قاجەتتٸگٸن ايتقان ەدٸ. پرەزيدەنت وسى ٶزەكتٸ مەسەلەنٸ ٶز باقىلاۋىنا الاتىنىن ايتتى.
