Olimpiada kezinde sportshylarymyz jeńgen saiyn "bul - búkil eldiń jeńisi" dep dúr-dúr etý negizinen sportty saiasilandyryp, memleket qaraýyna alǵan Resei men Qytai bastaǵan post-sovettik jáne sotsialistik elderge ǵana tán be dep qalam. Kúnine altyndy ýystap alyp jatqan Batys elderinde qandai da bir jeńis eń áýeli sol bir jeke sportshynyń mańdai teriniń nátijesi retinde qabyldanady. Ol jeńis tutas memlekettiń "ústem" ekenin, halqynyń "sapaly" ekenin, biliginiń "erekshe qamqor" ekenin kórsetpeidi. El ishinen shyqqan jeke bir chempionnyń jigerli, qajyrly, qairatty, talantty hám eńbekqor adam ekenin kórsetedi. Sol sebepti Ulybritaniia men Germaniia sportshysy, ia komandasy finalda kezdesip qalsa, jankúierler eń áýeli eki kúsh iesiniń nemese eki ujymnyń básekesin baqylaidy. Sportshylar da, olardyń qoldaýshylary da ótken tarihta Ulybritaniia men Germaniianyń arasynda bolǵan qisapsyz qyrǵyn, nebir soǵysty jadynda qaita jańǵyrtyp, bir-birine kektene qarap, kemsite sóilep, "jaman nemisten jeńildik-aý", ia bolmasa "tálpish aǵylshynnyń astyna túsip qor boldyq-aý", "basqany jeńý bir bólek te, aǵylshyndy tuqyrtý bir bólek qoi, shirkin!" dep kijinbeidi:) Jeńgen jaq ta, jeńilgen jaq ta jekpe-jek, jarys, ia matchtan soń tós qaǵystyryp, "kúsh atasyn tanymas" degen - osy" dep jyly jymiysyp taraidy.
Batys elderinde olimpiada quramasyn memleket emes, halyq qarjylandyrady. Mysaly, olimpiada jaqyndaǵan kezde AQSh-tyń bankteri barlyq klientterine arnaiy hat jiberedi. Sonyń birnesheýin óz kózimmen kórdim. Qysqasha baiandasam, bylai dep jazylǵan: "Qurmetti Pálenshe! Aldaǵy olimpiada kezinde ulttyq quramamyzdaǵy sportshylarymyzdyń mańdaiy jarqyrap júrýi úshin, sporttyq formasy erekshe ádemi bolyp tigilýi úshin, jatyn oryndary jailyraq, as-sýlary qunarlyraq, qural-jabdyqtary tolyǵyraq bolýy úshin qaiyrymdylyq qolyn sozsańyz. Josparymyz - 1 dollardan jinaý. Eger 2 dollaryńyzdy qisańyz - quba-qup. Qurmetpen, bankińiz". Sol sebepti de milliondaǵan amerikalyqtyń qarjysymen jarysqa attanǵan olimpiada quramasy shynaiy "halyq komandasy" bolyp qabyldanady. Olimpiada jeńimpazdaryna Ulybritaniia úkimeti kók tiyn tólemeidi. Óitkeni chempiondar elge oralǵasyn olarǵa erkin naryq zańdarymen is qylatyn jergilikti nebir biznes kompaniialar men brendter taýaryn nasihattaý úshin "jarnamamyzǵa tússeńiz" dep jata kep jabysady. Keibir ataǵy shyqqan júldegerler tiimdi kontraktiler arqyly milliondap ta paida tabady. Bylaisha aitqanda, ainalyp kelgende taǵy sol qarapaiym tutynýshylardyń - halyqtyń arqasynda eńbeginiń jemisin, beinetiniń zeinetin kóredi. Sondyqtan bilikke jaltaqtamaidy, prezidentke alǵys aitpaidy, úkimettiń piar aktsiialaryna pysqyryp ta qaramaidy.
Batys elderinde olimpiada quramasyna iliný úshin jeke-jeke áýesqoi sport klýbtarynyń arasynda ádil báseke ótedi. Olimpiadaǵa kim baratynyn quramanyń bas bapkeri sheshpeidi, báseke sheshedi. Sol sebepti keibir jarys túrleri boiynsha bir elden birneshe sportshy joldama alyp, qatar qatysyp jatady. Bunyń bir jaqsysy - jankúierler arasynda "Túgenshe myqtyraq edi, bas bapker óz kandidatyna bura tartyp, quramaǵa almai qoidy" degen áńgime týmaidy.
