Aqyn, aýdarmashy, jýrnalist, Ǵali Ormanovtyń 1939 jylǵy latyn qarpimen jazylǵan kúndeligi tabyldy, dep habarlaidy QazAqparat.
Ǵali Ormanov Jetisý ólkesinde, qazirgi Almaty oblysynyń Qapal aýdanyna qarasty Eshkiólmes taýynyń baýyrynda dúniege kelgen. Ol qazaq ádebietine 20-jyldardyń sońǵy shireginde kelgen, orystyń, Shyǵystyń klassikalyq úlgilerin aýdaryp, qazaq ádebietiniń aýdarma salasynda da úles qosqan. 1939-1945 jyldar aralyǵynda Jambyl Jabaevqa ádebi hatshylyq qyzmet atqarǵan. Kóptegen óleńder jinaǵynyń, birneshe poema, áńgime jáne ocherkterdiń avtory atanǵan.
Aqynnyń jien-nemeresi Aidar Qyryqbaiulynyń sózinshe, kúndelik shamamen 1939 jyly jazylǵan.
«Kúndelik latyn álipbiimen jazylǵan. Sol kúii saqtalyp, jazýy ózgermegen. Búginde sol kúndelik jazylǵan álipbidi biletin adamdar az eken. Sondyqtan kúndelikti jańarttyq. Aldaǵy ýaqytta aýdarýǵa beremiz. Kúndeliktiń mazmuny boiynsha Jambyl Jabaevqa kimder kelgen, qandai máseleler talqylanǵan degen málimet kórsetilgen. Kúndelik esh jerde jaryq kórmegen. Sondyqtan Jambyl atamyzdyń shyǵarmashylyǵyn zertteýge septigin tigizedi dep oilaimyn», - dedi A. Qyryqbaiuly
Kúndelikti Ǵali Ormanovtyń jary Aitbala Ormanova saqtaǵan. Keiinnen kúndelik aqynnyń qyzy Jamiǵa Ǵaliqyzyna tabystaldy.
«Elorda mektepteriniń birine Ǵ. Ormanovtyń esimi berilgen. 2007 jyldan beri atalǵan mekteptiń aldyna biýst ornatý máselesi kóterilip keledi. Qala ákimi Baqyt Sultanov bolǵanda biýdjetten Ǵali Ormanovtyń biýstin ornatý máselesi bekitilgen de bolatyn. Ókinishke qarai, áli kúnge deiin mektep aldyna biýst ornatylmady», - deidi Qyryqbaiuly.
Aita keteiik, Ǵ. Ormanov qyrǵyz eposy «Manastyń» 1-kitabyn, A.S. Pýshkinniń, M.Iu. Lermontovtyń, Ian Rainistiń, F.Maqtymqulynyń birqatar poemalaryn, N.V. Gogoldiń «Neva prospektisi» povesin, A.P. Chehovtyń áńgimelerin, M.Tursyn-Zadeniń «Úndistan balladalary» óleń kitabyn, L.N. Tolstoidyń «Anna Karenina» romanyn qazaq tiline aýdarǵan.
Almaty oblysynyń ákimi Amandyq Batalovtyń qoldaýymen Ǵali Ormanov aýdarǵan L.N. Tolstoidyń «Anna Karenina» romanynyń 2 tomdyǵy jaryq kóredi.
