Fýtboldan Reseide ótken Álem chempionatyn júrgizgen 15 sport kommentatorynyń ishindegi úzdikteri anyqtaldy. Úzdikterdi OKQ-da ótken baspasóz máslihatynda «Qazsport» telearnasynyń direktory Pavel Tsybýlin atady, dep habarlaidy QazAqparat tilshisi.
Baspasóz máslihatynda «Qazaqstan» teleradiokorporatsiiasynyń Basqarma tóraǵasy Erlan Qarin búgin tańerteń FIFA-nyń uiymdastyrý komitetinen fýtboldan Álem chempionatyn joǵary deńgeide kórsetilimin qamtamasyz etkeni úshin teleradiokorporatsiiaǵa alǵys hat kelgendigin aitty.
«Bir ai boiy áleýmettik jeliler nemese basqa da quraldar arqyly kórermenderimiz tarapynan kúnige alǵys hattar kelip túsýde. Ásirese, kommentatorlardyń jumysyn bólip atap jatyr. Álemdik fýtbol týraly aitpaǵanda, bizdiń televiziia úshin, bizdiń sporttyq jýrnalistika úshin bul da bir betburysty oqiǵa boldy. Sebebi bizdiń aýditoriia ózimizdiń telearnalarǵa, sport kommentatorlaryna kóńil buryp, eńbekterin baǵalap jatyr», - deidi ol.
Erlan Qarin óz sózinde bir ai boiy fýtbol oiynyn júrgizip kelgen sport komentatorlaryna alǵysyn bildirdi.
«Barlyq áleýmettik jelilerde arnaiy baiqaý uiymdastyryp, bizdiń kommentatorlardyń jumysyn qalai baǵalaitynyn bilgimiz keldi. Qai sport kommentatory úzdik dep ataisyzdar dep baiqaý jariialaǵan edik. Baiqaýǵa usynystar áli de túsip jatyr. Biraq, birden bizdiń de, jankúierlerdiń de bergen baǵasy boiynsha oiymyz bir jerden shyǵyp otyr», - deidi Erlan Qarin.
Belgili bolǵandai, fýtboldan Álem chempionatyn qazaq jáne orys tilinde 15 sport kommentatory júrgizgen. Baiqaý áleýmettik jelilerde korporatsiianyń barlyq akkaýntarynda jariialanǵan.
Erlan Qarinniń aitýynsha, sport kommentatorlarynyń júrgizýinde asa úlken qatelikter bolmaǵan.
«Chempionatty júrgizgen áriptestermen kelisip, olardy baqylap, kórermenderdiń reaktsiiasyn baqylap otyratynymyzdy eskerttik. Sodan keiin áleýmettik jelige shyqtyq», - deidi ol.
Osydan keiin «Qazsport» telearnasynyń direktory Pavel Tsybýlin áleýmettiń baǵasy boiynsha anyqtalǵan úzdik sport kommentatorlardy atady. Olar - Ermuhamed Máýlen men Esei Jeńisuly, Sergei Railian jáne Timýr Súleimenov.
Erlan Qarinniń aitýyna qaraǵanda, úzdik atanǵandarǵa aqshalai syiaqy beriledi.
Eske sala ketsek, fýtboldan Álem chempionatynyń finalynda Frantsiia men Horvatiia quramalary kezdesip, Frantsiia jeńiske jetken bolatyn.
