Ispaniialyq «Barselonanyń» bas bapkeri aýysty, dep habarlaidy "Ult aqparat".
Klýbtyń resmi saity málim etkendei, ispaniialyq, 55 jastaǵy Ernesto Valverde bas jattyqtyrýshy retindegi qyzmetinen ketti.
E.Valverde «Barselonaǵa» 2017 jyldan beri jetekshilik etti. Onyń basshylyǵymen ataqty klýb Ispaniianyń eki márte chempiony atandy. Sondai-aq bir retten eldiń kýbogy men sýperkýbogyn jeńip aldy. Alaida chempiondar ligasynda shirek jáne jartylai finalda sáikesinshe italiialyq «Roma» (4:1, 0:3) men aǵylshyndyq «Liverpýl» (3:0, 0:4) klýbtaryna jol berip, jarystan shyǵyp qaldy.
E.Valverdeniń jetekshiligimen ótken 163 resmi matchtyń 108-i jeńispen, 35-i teń oiynmen, 20-sy utylyspen aiaqtaldy.
«Barselona» qazirgi kezde Ispaniia chempionatynda 19 týrdan keiin 40 upaimen birinshi orynda keledi. Áitse de onyń syralǵy qarsylasy Madridtiń «Realynyń» da 40 upaiy bar. «Barselona» tek qosymsha kórsetkishter boiynsha alda tur.
Kataloniialyq klýb jýyrda Ispaniia sýperkýbogy úshin ótken jartylai finalda «Atletiko» (Madrid) komandasynan jeńip turyp, utylyp qaldy. Munda finalda «Real» men «Atletiko» klýbtary teń oinap (0:0), penalti seriiasynda Zinedin Zidannyń komandasy jeńiske jetti. E.Valverdemen kelisimsharttyń erte úzilýine bul da áser etken bolýy múmkin.
«Barselona» bas bapkerdi taǵaiyndaý máselesin kidirtken joq. 61 jastaǵy ispaniialyq maman Kike Setenmen kelisimshart 2022 jyldyń 30 maýsymyna deiin jasaldy.
K.Seten buǵan deiin ispaniialyq «Betiske» jetekshilik etip, ony 2017-2018 jylǵy el chempionatynda altynshy orynǵa shyǵardy. Al 2018-2019 jylǵy maýsymda Ispaniia kýbogynyń jartylai finalyna deiin jetkizdi.
Aita keteiik, «Barselona» 17 jyldan beri maýsym barysynda bas bapkerin aýystyrmaǵan edi. 2003 jyly kataloniialyqtar Niderlandy mamany Lýi van Galdy qyzmetinen ketirip, ornyna serbiialyq Radomir Antichti alǵan bolatyn. Onda «Barselona» birinshi orynnan 20 upaiǵa qalyp kele jatqan edi. Aqyry 2002-2003 jylǵy birinshilikti klýb altynshy orynmen aiaqtady.
