El chempiony «Astanaǵa» Qazaqstan quramasynyń tórt oiynshysy qaityp oraldy, – dep habarlaidy "Ult aqparat".
Qaqpashy Dmitrii Nepogodov, qorǵaýshylar Sergei Malyi men Marat Bystrov jáne shabýylshy Aleksei Shetkinniń shymkenttik «Ordabasyǵa» jalǵa berý ýaqyty bitkendikten, klýbqa qaita qosyldy.
Ótken maýsymda S.Malyi «Ordabasy» quramynda 29 oiyn ótkizip, bir gol soqty. Onyń elordalyq klýbpen kelisimsharty aldaǵy jazda bitedi. A.Shetkin shymkenttiktermen birge 22 matchta qarsylastar qaqpasyna jeti gol engizdi. 23 kezdesý ótkizgen M.Bystrov ta «Ordabasynyń» negizgi fýtbolshysyna ainalǵan bolatyn.
Bul ekeýiniń «Astanamen» bir jylǵa kelisimsharty bar. Shymkenttik komanda qaqpasyn 29 márte qorǵaǵan D.Nepogodov premer-ligada ótken jylǵy maýsymnyń úzdik qaqpashysy atandy.
«Astana» klýbynyń bapkerleri Portýgaliiada ótetin oqý-jattyǵý jiynyna ketkenshe kelgen tórt oiynshynyń qaisysy komandamen qalatynyn, qaisysy qaitadan jalǵa beriletinin sheshýi tiis. Sonymen qatar elordalyq klýbqa Qyzylordanyń «Qaisarynan» Armeniia quramasynyń shabýylshysy Tigran Barsegian kelmekshi.
«Astana» fýtbol klýbynan túsken málimetke qaraǵanda, elordalyqtar Portýgaliiadaǵy jiyn barysynda Angliia chempionshipiniń ókili «Brentford» klýbymen 25 qańtarda joldastyq kezdesý ótkizedi. Londondyqtar qazirgi kezde úshinshi orynda keledi, iaǵni aǵylshyn premer-ligasyna ótýden úmitkerlerdiń biri.
