Premer-ligada óner kórsetetin «Aqjaiyqqa» jańadan eki ýkrainalyq oiynshy alyndy, dep habarlaidy "Ult aqparat".
«Aqjaiyq» fýtbol klýbynyń direktory Azamat Shaihynyń aitýynsha, qorǵaýshy Artem Baranovskii men shabýylshy Mikola Kovtaliýkpen kelisimshartqa qol qoiyldy.
Tájiribeli A.Baranovskii 30 jasta. Oǵan Qazaqstan premer-ligasy da tańsyq emes, qorǵaýshy buǵan deiin «Shahter» (Qaraǵandy), «Qyzyljar» (Petropavl) komandalarynyń namysyn qorǵady.
Al 25 jastaǵy M.Kovtaliýk osy kezge deiin Ýkraina, Grýziia klýbtarynda oinaǵan. Sonyń ishinde «Dinamo» (Tbilisi) quramynda Grýziianyń kúmis júldegeri atanǵan.
«Komanda osymen tolyq jasaqtaldy. Qazir Oraldamyz. 14 naýryz kúni Qostanaidyń «Tobylymen» syrt alańda ótetin alǵashqy oiynǵa daiyndalý ústindemiz», dedi A.Shaihy.
