Premer-ligada óner kórsetetin «Aqjaiyq» komandasyna jańadan bes oiynshy alyndy, dep habarlaidy "Ult aqparat".
«Aqjaiyq» fýtbol klýbynyń direktory Azamat Shaihynyń málim etkenindei, olardyń ekeýi – Oralda aiaqdop álippesin bastaǵan Erkin Tapalov pen Meiram Sapanov.
Jartylai qorǵaýshy E.Tapalov «Aqjaiyq» sapynda 120 match ótkizip, 1 gol soqty.
Kezinde Qazaqstan ulttyq quramasyna shaqyrylǵan Erkin premer-ligada 98 oiynda alańǵa shyqty. «Aqjaiyqqa» qaityp oralǵanǵa deiin «Shahter» (Qaraǵandy), «Jetisý» (Taldyqorǵan), «Kaspii» (Aqtaý) komandalarynda top tepti.
Tájiribeli qorǵaýshy, kezinde oraldyq klýbtyń kapitany bolǵan M.Sapanov «Aqjaiyq» quramynda 268 kezdesýde 14 goldyń avtory atandy. Sońǵy eki maýsymda «Jetisýdiń» namysyn qorǵady.
Jańadan alynǵandardyń úsheýi – reseilikter. «Aqjaiyqpen» kelisimshartqa 23 jastaǵy jartylai qorǵaýshy Evgenii Iatskii qol qoidy. Samara fýtbolynyń túlegi sońǵy eki maýsymdy «Akronda» (Toliatti) ótkizdi.
Taǵy bir jartylai qorǵaýshy, 25 jastaǵy Soslan Takýlov «Satýrn» (Ramenskoe), «Slýtsk» (Slýtsk) klýbtarynda oinaǵan. 2020 jyly qaraǵandylyq «Shahter» komandasy sapynda 16 match ótkizdi.
«Krasnodar» klýbynda 2013 jyly kásibi sporttyq jolyn bastaǵan jartylai qorǵaýshy Marat Býraev ta 25 jasta. Ol ár jyldary armeniialyq «Piýnik», belorýssiialyq «Slýtsk» komandalarynda oinap úlgerdi.
«Túrkiiada ótip jatqan oqý-jattyǵý jiynynda basqa da fýtbolshylardy qarap jatyrmyz. Negizinen jergilikti oiynshylarǵa úmit artatyn bolamyz», dedi QazAqparat tilshisine Azamat Shaihy.
