31 shilde kúni Parijde on myńnan astam adam kóshege shyǵyp, koronavirýs sanitarlyq pasportyna qarsylyq bildirdi. Olar el prezidenti Emmanýel Makronnyń koronavirýspen kúres sharalaryna narazy, dep jazady Azattyq.
Memleket basshysy adamdardy ekpe saldyrýǵa shaqyryp, kónbegenderge shekteýler engizýdi usynǵan. Al osy aptada el parlamenti jańa zań qabyldap, ol boiynsha densaýlyq saqtaý salasynyń qyzmetkerleri vaktsina saldyrýǵa mindetti bolyp shyqty. Al dámhanalar men barlarǵa kirgende, poiyzǵa otyrǵanda, mýzei men kinoteatr sekildi jabyq oryndarǵa barǵanda sanitarlyq pasport kórsetý qajet boldy. Sanitarlyq pasportta kisiniń ne teris nátijeli PTR anyqtamasy bary ne tolyq vaktsinalanǵany kórsetiledi.
67 million halqy bar Frantsiiada halyqtyń jartysyna jýyǵy tolyq vaktsinalanǵan. Biraq álemde koronavirýstyń "delta" varianty tez tarap, dominant variantqa ainalǵan tusta 30 shilde kúni elde 24 myń Covid naýqasy tirkeldi. Shildeniń basynda kún saiyn nebári birneshe myń ǵana naýqas anyqtalatyn. El biligi buǵan jaýap retinde koronavirýspen kúres sharalaryn kúsheitýdi jón kórdi. Biraq munysy narazylyqqa tap boldy.
"Biz segregatsiialanǵan qoǵam qurǵaly otyrmyz, adam quqyǵyn álpeshteitin elde mundai nárseni jasaý adam oiyna syimaidy" dedi Parijdegi narazylardyń biri Anna esimdi muǵalim. Muǵalim tegin aitýdan bas tartty. "Men kóshege sol sebepti shyqtym. Osyǵan deiin narazylyqqa qatysyp kórmegenmin. Menińshe bizdiń bostandyǵymyzǵa qaýip tónip tur".
Narazylyq aktsiiasy salystyrmaly túrde beibit ótti. Biraq kei jerlerde sherýshiler politsiiamen qaqtyǵysyp qalyp jatty. Associated Press agenttiginiń málimetinshe, Frantsiiada qarsylyq aktsiiasyna 200 myńnan astam adam, el astanasy Parijde 14 myńnan astam adam qatysqan. Mundai aktsiialar elde úshinshi apta qatarynan ótip jatyr.
Indet bastalǵaly elde koronavirýspen 6,2 millionǵa jýyq naýqas tirkelip, onyń 112 myńy qaitys bolǵan.
