Ózbekstan eliniń biligi Sardoba sý qoimasyndaǵy bógettiń jarylýynyń úsh sebebin jariialady. Tótenshe jaǵdaidy tergeý amaldarynyń nátijelerimen arnaiy brifing kezinde Ózbekstan Respýblikasy Tótenshe jaǵdai ministriniń birinshi orynbasary Abdolla Quldashev málimdedi, dep habarlaidy "Ult aqparat".
«Eń aldymen, buǵan Sý resýrstary ministrligi kináli, sebebi vedomstvo nysandy uiymdastyrý, jobalaý jáne salý kezinde jaýapsyzdyq tanytty. Qurylysty tolyq paidalanýǵa berý kezinde atalǵan sý qoimasyn paidalanýdyń erejeleri bekitilgen joq. Bul protseste tehnikalyq jáne normativtik talaptar kúrdeli buzylǵan. Ekinshi sebep: sý qoimasynyń jumys qujattaryn daiarlaǵan UzGip jobalyq uiymy, tehnikalyq-ekonomikalyq negizdemeniń keibir sátterin eskermesten ózdiginen ózgerister engizgen. Osylaisha, mysal retinde, bógettiń konstrýktsiiasy men seismoturaqtylyǵyna mán berilgen joq.
Bolǵan oqiǵaǵa sondai-aq merdiger men «Ýzbekiston temir iýllari» AAQ-nyń sýbmerdigerleri jaýapty bolýda. Olar qaǵazda jáne is júzinde kórsetkishterdiń ara qatynasy – bógettegi topyraq tyǵyzdyǵyn atap ótken joq, al filtr men tas qabatynyń qalyńdyǵy jobada kórsetilgennen az bolyp shyqqan. Iaǵni, Sardoba bógetin salý kezinde buzýshylyqtar jobalaý kezinde jasalyp, jaǵdai qurylys pen paidalanýǵa berý kezinde odan da nasharlady, dep habarlady A.Quldashev.
TJM basshysy orynbasarynyń málimetinshe, 17 ókiletti tulǵa qylmystyq jaýapkershilikke tartyldy. Olardyń isteri Joǵarǵy sotqa jiberildi.
Eske sala ketsek, 2020 jyldyń 1 mamyrynan bastap Sardoba sý qomasyndaǵy bógettiń tómengi jaǵyn sý shaiyp ketýinen Syrdariia oblysy Sardoba aýdanynyń aýmaǵynda sý jaiyldy. Sýdyń negizgi aǵynyn tómendetý úshin ózbek tarapy shliýzderdi sýarý kanaldaryna ashty. Sonyń saldarynan Túrkistan oblysy Maqtaaral aýdanynyń Jeńis jáne Jańa Turmys eldi mekenderin sý basty.
