AQSh-tyń halyqaralyq din erkindigi jónindegi komissiiasy Ózbekstandy AQSh úkimetiniń "erekshe alańdatatyn elder" tizimine qosýǵa keńes berdi.
Jyldyq esebinde komissiia Ózbekstanda 2020 jyly osy tizimge qosýǵa sebep bolatyn zań buzýshylyqtar kóp boldy dep túigen.
AQSh memlekettik departamenti Ózbekstandy qara tizimninen byltyrǵy 2 jeltoqsanda ǵana shyǵarǵan edi. Sol kezde Qurama Shtattar din erkindigi salasynda jetken jetistigi úshin Ózbekstandy maqtaǵan.
Bul ýaqytta, amerikalyq Foreign Policy basylymy Shavkat Mirziiaev úkimetiniń din erkindigin baqylaýda ustaý men erkindik berý arasyndaǵy tepe-teńdikti saqtai almai otyrǵanyn jazdy.
Foreign Policy basylymyndaǵy maqalasynda jýrnalist Agneshka Pikýlitska biyl naýryzda Tashkentte júz shaqty adam LGBT quqyǵyna qarsy mitingine jinalǵanyn, olar "Allahý Akbar" dep aiqailaǵanyn, LGBT qaýymdastyǵynyń ókilderin izdegenin habarlady. Narazy top kem degende eki jasóspirimdi soqqyǵa jyqqan.
Bunyń aldynda áleýmettik jelide dini konservatorlar men LGBT belsendileri onlain-pikirtalasqa tústi. Ózbekstannyń qylmystyq kodeksinde bir jynysty qatynas ornatqandarǵa jaza belgilengen. Sol kúni LGBT quqyqtary jónindegi bloger Miraziz Bozorovty belgisiz bireýler uryp ketti.
Quqyq qorǵaý organdary shabýyldy tekserip jatqanymen, bilik Bozorovty tártipsizdikke shaqyrdy dep aiyptady. Birneshe kúnnen soń Ózbekstan prezidenti Shavkat Mirziiaevtiń resmi emes ókili dep sanalatyn Komil Allamjonov: "Álbette, adam quqyqtary - mańyzdy másele, memleket árbir azamatty qorǵaidy. Biraq musylmandar kóp turatyn bizdiń elde bir jynystylar bailanysyn qabyldamaidy. Qasietti dinimiz, mádenietimiz oǵan jol bermeidi", - dep jazdy.
Ózbekstanda bir ai buryn bolǵan osy oqiǵadan soń adam quqyqtaryn qorǵaityn uiymdar alańdai bastady.
