اقش-تىڭ حالىقارالىق دٸن ەركٸندٸگٸ جٶنٸندەگٸ كوميسسيياسى ٶزبەكستاندى اقش ٷكٸمەتٸنٸڭ "ەرەكشە الاڭداتاتىن ەلدەر" تٸزٸمٸنە قوسۋعا كەڭەس بەردٸ.
جىلدىق ەسەبٸندە كوميسسييا ٶزبەكستاندا 2020 جىلى وسى تٸزٸمگە قوسۋعا سەبەپ بولاتىن زاڭ بۇزۋشىلىقتار كٶپ بولدى دەپ تٷيگەن.
اقش مەملەكەتتٸك دەپارتامەنتٸ ٶزبەكستاندى قارا تٸزٸمنٸنەن بىلتىرعى 2 جەلتوقساندا عانا شىعارعان ەدٸ. سول كەزدە قۇراما شتاتتار دٸن ەركٸندٸگٸ سالاسىندا جەتكەن جەتٸستٸگٸ ٷشٸن ٶزبەكستاندى ماقتاعان.
بۇل ۋاقىتتا, امەريكالىق Foreign Policy باسىلىمى شاۆكات ميرزيياەۆ ٷكٸمەتٸنٸڭ دٸن ەركٸندٸگٸن باقىلاۋدا ۇستاۋ مەن ەركٸندٸك بەرۋ اراسىنداعى تەپە-تەڭدٸكتٸ ساقتاي الماي وتىرعانىن جازدى.
Foreign Policy باسىلىمىنداعى ماقالاسىندا جۋرناليست اگنەشكا پيكۋليتسكا بيىل ناۋرىزدا تاشكەنتتە جٷز شاقتى ادام لگبت قۇقىعىنا قارسى ميتينگٸنە جينالعانىن, ولار "اللاحۋ اكبار" دەپ ايقايلاعانىن, لگبت قاۋىمداستىعىنىڭ ٶكٸلدەرٸن ٸزدەگەنٸن حابارلادى. نارازى توپ كەم دەگەندە ەكٸ جاسٶسپٸرٸمدٸ سوققىعا جىققان.
بۇنىڭ الدىندا ەلەۋمەتتٸك جەلٸدە دٸني كونسەرۆاتورلار مەن لگبت بەلسەندٸلەرٸ ونلاين-پٸكٸرتالاسقا تٷستٸ. ٶزبەكستاننىڭ قىلمىستىق كودەكسٸندە بٸر جىنىستى قاتىناس ورناتقاندارعا جازا بەلگٸلەنگەن. سول كٷنٸ لگبت قۇقىقتارى جٶنٸندەگٸ بلوگەر ميرازيز بوزوروۆتى بەلگٸسٸز بٸرەۋلەر ۇرىپ كەتتٸ.
قۇقىق قورعاۋ ورگاندارى شابۋىلدى تەكسەرٸپ جاتقانىمەن, بيلٸك بوزوروۆتى تەرتٸپسٸزدٸككە شاقىردى دەپ ايىپتادى. بٸرنەشە كٷننەن سوڭ ٶزبەكستان پرەزيدەنتٸ شاۆكات ميرزيياەۆتٸڭ رەسمي ەمەس ٶكٸلٸ دەپ سانالاتىن كوميل اللامجونوۆ: "ەلبەتتە, ادام قۇقىقتارى - ماڭىزدى مەسەلە, مەملەكەت ەربٸر ازاماتتى قورعايدى. بٸراق مۇسىلماندار كٶپ تۇراتىن بٸزدٸڭ ەلدە بٸر جىنىستىلار بايلانىسىن قابىلدامايدى. قاسيەتتٸ دٸنٸمٸز, مەدەنيەتٸمٸز وعان جول بەرمەيدٸ", - دەپ جازدى.
ٶزبەكستاندا بٸر اي بۇرىن بولعان وسى وقيعادان سوڭ ادام قۇقىقتارىن قورعايتىن ۇيىمدار الاڭداي باستادى.
