QR Indýstriia jáne infraqurylymdyq damý ministri Jeńis Qasymbek Qazaqstanda ashylatyn jańa loýkoster Fly Arystan jumysy jóninde pikir bildirdi, dep habarlaidy QazAqparat tilshisi.
"Biyl mamyr aiynda Fly Arystan áýe kompaniiasy óz jumysyn bastaidy. Eki borty Qazaqstanda daiyn tur. Jyl sońyna deiin sý jańa tórt A320 ushaqtary alynady. Qazirgi ýaqytta áýe kompaniiasynyń jumysy boiynsha zańnamaǵa sáikes ózgertýler engizip jatyrmyz", - dedi Jeńis Qasymbek Úkimet úiinde "Otandyq óndiristi damytý jáne kólik-logistika salasyn jańǵyrtý" brifinginde.
Onyń aitýynsha, bilet quny Qazaqstanda Air Astana baǵasynan eki esege arzan bolady.
"Máselen, túrli baǵytqa Air Astana biletteri shamamen 100 dollardy quraidy. Bul baǵa satyp alý merzimine bailanysty ózgerip otyrady: bir apta turyn alsańyz - bir baǵa, úsh kún buryn alsańyz - basqa baǵa degendei. Fly Arystan biletteri Qazaqstan baǵyttary boiynsha shamamen 40-45 dollar bolady dep boljap otyrmyz. Demek, Qazaqstandaǵy Air Astana, BekAir, Scat kompaniialarynan anaǵurlym tómen", - dedi ministr.
Naýryz aiynyń basynan bastap, mamyr aiynda ushatyn Fly Arystan biletterin satyp alýǵa bolady.
"Bizdiń mindetimiz - Qazaqstan azamattaryna ushaq biletin qoljetimdi etý. Munda kórsetiletin qyzmet te ózgesheleý bolady. Ádettegidei tegin 20 keli emes, 5 keli júk orny beriledi. Odan artyq júk úshin qosymsha aqy tóleýge týra keledi. Jańa áýe jelisine biýdjetten nemese Samuryq-Qazynadan qosymsha qarjy bólinbeidi. Bul kompaniia Air Astana qarajaty esebinen jumys isteidi", - dep túsindirdi J. Qasymbek.
