Qazaqstandyq kásipqoi boksshy Firýza Sháripova sporttaǵy karerasyn aiaqtaitynyn jariialady, dep habarlaidy "Ult aqparat".
«Men ózimniń jattyqtyrýshylaryma, menedjerime, komandama eren eńbegi úshin alǵys aitam. Biz birge Qazaqstanda birneshe rekord ornattyq. Kásipqoi boksta osyndai qysqa merzim ishinde bizden basqa eshkim mundai zor nátijege jetken emes», - dep jazdy boksshy Instagram paraqshasynda.
Boksshy kásipqoi bokstaǵy basty titýlǵa bir qadam qalǵanymen, osy jerden toqtaýǵa májbúr ekenin aitady.
«Biz 2018 jyly WBC boiynsha álem chempiony ataǵyn alýǵa daiyn edik, biraq qarjylyq sebepterge bailanysty bul múmkin bolmady. Bizge WBC álem chempiony ataǵyn alý úshin birneshe ret qarajat beriledi dep ýáde etilgenimen, aqsha aqyry bólinbedi. Eki jyl boiy osy ataqty kez kelgen ýaqytta jeńip alý úshin formamdy saqtap keldim. Aqyry kúte-kúte sharshadym. Ókinishke qarai, men bul kúsh-jigerdi nátijege ainaldyrýdyń keleshegin kórip turǵan joqpyn. Osy ýaqyt ishinde kóp ýáde berildi, biraq bári de qur sóz kúiinde qaldy», - deidi ol.
Boksshy barlyq jankúierlerine alǵys aitty.
«Meni qoldaǵan barlyǵyńyzǵa kóp rahmet aitqym keledi. Basty ataqty jeńip, qýanta almaǵanym úshin keshirińizder. Men qoldan kelgenniń bárin jasadym, biraq bári maǵan bailanysty emes», - dedi Firýza Sháripova.
