FIFA (Halyqaralyq fýtbol federatsiiasy) prezidenti Djanni Infantino álem chempionaty jaqyndaǵan tusta Iran biligin áielderdi fýtbol alańdaryna kirgizbeitin "tyiymdy alyp tastaidy dep úmittenetinin" málimdedi.
Federatsiia prezidenti 19 qyrkúiekte jasaǵan málimdemesinde bul tyiym jóninde Irandaǵy fýtbol boiynsha jaýapty sheneýniktermen birneshe ret bailanysqanyn, qazir FIFA delegatsiiasy Iranda ekenin aitty.
"Pozitsiiamyz aiqyn jáne naqty. Iran áielderi fýtbol alańdaryna kire alýy kerek" dedi ol.
Federatsiia ókilderi Iranǵa erlershe kiinip, alańǵa kirmek boldy degen aiyp taǵylǵan soń ózin-ózi órtep jibergen 29 jastaǵy áieldiń qazasynan keiin kelgen. "Kógildir qyz" degen laqaby bar Sahar Hodaiari 9 qyrkúiekte Tegeran aýrýhanasynda qaitys boldy.
Biraq FIFA Iranǵa saparlap kelýin bul oqiǵamen bailanystyramyz dep ashyq aitpady. Federatsiia Tegeran ókilderimen Álem kýbogine irikteý boiynsha 10 qazanda ótetin Iran-Kambodja matchyna bailanysty kezdeskenin málimdegen. Biraq Infantino málimdemesinde Iran biliginen ózgeris kútetinin ańǵartty.
"Belgili bir qadamǵa barmas buryn onyń saldary qaýipsiz bolýy kerek degendi oilaný qajetin túsinemiz. Biraq qazir ózgeris jasaityn sát týdy. FIFA qazanda ótetin ishki matchtan bastap Irannan oń ózgeris kútedi" dedi federatsiia prezidenti.
10 qazanda Tegerandaǵy Azadi alańynda Iran men Kambodja quramalary 2022 jyly ótetin álem chempionatyna qatysý úshin irikteý matchyn ótkizedi.
Buryndary bilik fýtbol kórýge ne erler qatysatyn sportty tamashalaýǵa tek iriktelgen áielder tobyn ǵana kirgizetin. Iranda áielderge sport nysandaryna kirýge tyiym salynatyny eshbir zańda jazylmaǵan. Biraq moldalar erler jartylai jalańash júretin, boǵaýyz sózder aitylatyn jerlerge áielderdi kirgizbeý kerek degendi aityp júredi.
Quqyq qorǵaýshylar Tegeranǵa jetkilikti qysym kórsete almady dep FIFA-ny synǵa alǵan.
