Foto: Lovepik
Qazaqstan halyqaralyq FIFA Arena jobasyn júzege asyrý týraly kelisimge alǵashqylardyń biri bolyp qol qoidy, dep habarlaidy Ult.kz.
Bul bastama balalar men jasóspirimder fýtbolyn damytýǵa jáne mektep oqýshylaryna zamanaýi sport infraqurylymyna teń qoljetimdilik jasaýǵa baǵyttalǵan. Joba aiasynda elimizdegi jalpy bilim beretin mektepterdiń aýmaǵynda 100 shaǵyn fýtbol alańy salynady.
Bul – jobaǵa qatysýshy elder arasyndaǵy eń joǵary kórsetkish. Alǵashqy alańdar biyl Hromtaý men Kókshetaý qalalarynda paidalanýǵa beriledi. Baǵdarlamany tolyq aiaqtaý 2027 jylǵa josparlanǵan. Jobany Qazaqstan fýtbol federatsiiasy QR Týrizm jáne sport ministrliginiń qoldaýymen júzege asyrýda.
Ár alań FIFA standartyna sáikes salynady: kólemi 20×40 metr, jańa býyndaǵy jasandy shóp jabyny tóseledi (non-infill turf), kiriktirilgen qaqpa, qorshaý panelderi men qaýipsizdik torlary ornatylady. Ámbebap qurylym alańdardy qoldanystaǵy mektep aýlalary men sport aimaqtaryna yńǵaily túrde salýǵa múmkindik beredi.
Joba eń aldymen shaǵyn qalalar men aýyl mektepterin qamtidy. Qarjylandyrýdy FIFA qamtamasyz etse, QR Týrizm jáne sport ministrligi, Oqý-aǵartý ministrligi men jergilikti atqarýshy organdar uiymdastyrýshylyq qoldaý kórsetedi.
Búginde fýtbol elimizdiń barlyq óńirinde damyp, eń tanymal buqaralyq sport túrleriniń biri sanalady. Qazirgi tańda fýtbolmen 1,1 millionnan astam adam júieli túrde ainalysady. Odan bólek 7 378 jattyqtyrýshy jumys isteidi. Elimizde 280 stadion, 148 fýtbol maneji, 7 myńnan astam mektep alańy jáne 400-den asa dene shynyqtyrý-saýyqtyrý kesheni bar. Premer-ligada 14 kásibi klýb óner kórsetse, 242 balalar-jasóspirimder sport mektebinde 40 myńnan astam jas fýtbolshy daiyndalýda.
Keiingi jyldary elimizde FIFA jáne ÝEFA-nyń qoldaýymen Talǵarda ulttyq quramalarǵa arnalǵan oqý-jattyǵý bazasy, Astanadaǵy Fýtbol úii men manej, Shymkenttegi jeke «BIIK» bazasy jáne Qostanaidaǵy «Tobol» klýbyna arnalǵan tolyqqandy manej salyndy.
