Aýyl óndirýshileriniń qaryzdaryn kepildendirý jáne saqtandyrýdyń tiimdi júiesin qurý da - ózekti másele. Bul týraly Jazylbek Qýanyshbaevtyń 125 jyldyǵyna arnalǵan «Qazaqstannyń qoi sharýashylyǵy: ótkeni, búgini jáne keleshegi» taqyrybyndaǵy konferentsiiada QR Memlekettik hatshysy Qyrymbek Kósherbaev aitty, dep habarlaidy QazAqparat.
«Álemdik órkeniettiń barlyq qundylyqtary, ekonomikalyq jáne mádeni bailyqtar virtýaldy qarjy institýttarymen emes adamnyń eńbegimen jasalady. Sondyqtan áleýmettik jańǵyrtý saiasatynyń negizine shynaiy óndiristik eńbektiń qoiylýy óte oryndy. Ata-babalarymyz eldiń kósegesi eńbekpen kógeretindigin, eńbek arqyly ǵana ushpaqqa shyǵýǵa bolatyndyǵyn urpaǵyna amanat retinde aityp ketkeni belgili. Halyqtyń ál-aýqaty jaqsarýy úshin eń áýeli sanaly, eńbekqor, kásip pen básekege beiim urpaq tárbieleýimiz qajet. Bul úshin ádilettilik qaǵidattaryn alǵa shyǵarý kerek. Eńbek sińirýden bastap, marapat berýge deiin memleket qana emes, qoǵamnyń da kózqarasy ádil bolǵany durys. Eń bastysy otandastarymyzdyń sanasyna eńbektiń qadiri men kásipqoilyq rýhyn sińirýge tiispiz. Adam ózine, óziniń kúsh-jigerine, bilimine senip, erinbei eńbek etkende ǵana shynaiy baqytqa, mol dáýletke jete alatyndyǵyn uǵyndyrýymyz kerek. Sondai-aq azamattardyń boiyna sondai senim uialata alýymyz qajet», - dedi Memlekettik hatshy.
Onyń atap ótýinshe, eńbek kúshin jańa tehnologiialarmen ushtastyra bilý de zaman talaby.
«Qazirgi tańda Qazaqstannyń agroónerkáip keshenin innovatsiialyq baǵytqa túsire bilý óte mańyzdy. Bul bizdiń dástúrli salamyz. Dúniede azyq-túlikke degen qajettilik arta beredi. Bul sektorǵa investitsiia kóbirek salynady. Sondyqtan búgingi fermeler ýaqytsha ári aýa raiyna bailanysty kezdeisoq jetistikterge maldanyp qalmai, óndiristik ósim jóninde oilanýǵa tiis», - dedi ol.
Memlekettik hatshy jahandyq aýyl sharýashylyǵy óndirisinde básege óse beretindigin, jermen jumys isteitinder eń aldymen jańa tehnologiialardy engizip, ónimdilikti úzdiksiz arttyryp, jumysyn álemdik standarttar negizinde júrgizýi kerektigin basa aitty.
«Sondyqtan Memleket basshysy Qasym-Jomart Toqaev atap ótkendei, bolashaq agrarlyq sektorda, ásirese shaǵyn jáne orta biznes túrindegi jańa óńdeý kásiporyndary jelisin qurýda. Bul tusta biz biznesti nesie arqyly qoldaýǵa tiispiz. Fermerler uzaqmerzimdi qarjylandyrý men ótkizý naryqtaryna deldalsyz tikele shyǵa alatyn bolýy tiis. Aýyl óndirýshileriniń qaryzdaryn kepildendirý jáne saqtandyrýdyń tiimdi júiesin qurý da ózekti másele», - dedi Qyrymbek Kósherbaev.
