Halyqaralyq tennis federatsiiasy Londondaǵy shtab-páterinde Federatsiia kýbogynyń biylǵy plei-off básekesiniń jerebesin jariia etti, dep habarlaidy "Ult aqparat".
Qazaqstan tennis federatsiiasy málim etkenindei, qazaqstandyq qyzdar Argentina quramasymen kezdesedi.
Bes oiynnan turatyn match 17-18 sáýir kúnderi Argentinada ótedi. Kezdesýdiń dál qaida bolatyny keiin anyqtalady.
Plei-off básekesiniń basqa juptary mynadai: Polsha – Braziliia, Meksika – Ulybritaniia, Serbiia – Kanada, Latviia – Aziia/Tynyq muhity aimaǵynyń jeńimpazy, Japoniia – Ýkraina, Rýmyniia – Italiia, Niderlandy – Aziia/Tynyq muhity aimaǵynyń jeńimpazy.
Qazaqstan quramasy argentinalyqtardy jeńse, onda 2021 jyly aqpanda ótetin Federatsiia kýbogynyń irikteý kezeńinde qaitadan baq synaityn bolady. Biyl qazaqstandyqtar osy kezeńde belgiialyqtarǵa jol bergen edi.
Argentinalyqtar amerikalyq aimaqtyń jeńimpazy retinde plei-off básekesine joldama aldy. Santiagoda olar Meksikadan (2:1), Chiliden (2:1), Perýdan (3:0) jáne Kolýmbiiadan (2:0) basym tústi.
Argentina óz tarihynda Federatsiia kýbogynda 1964, 1983, 1985, 1987, 1992, 2001 jáne 2004 jyldary shirek finalda oinady. Eki márte (1986 jáne 1993 jyldary) jartylai finalǵa deiin jetti.
Joǵary divizionda Argentina sońǵy ret 2015 jyly 7-8 aqpanda synǵa túsip, Býenos-Aireste AQSh quramasynan (1:4) jeńilip qaldy.
Dúniejúzilik reitingte 172-orynda turǵan 23 jastaǵy Nadia Podoroska Argentinanyń 1-raketkasy bolsa, qurama kapitany – burynǵy kásibi tennisshi, 53 jastaǵy Mersedes Pas.
Eske sala keteiik, budan buryn Aleksandr Býbliktiń Rotterdam týrniriniń ekinshi ainalymyna shyqqanyn, al Iýliia Pýtintsevanyń Sankt-Peterbýrgte jeńilip qalǵanyn jazǵan bolatynbyz.
