21 qyrkúiekte Reseide mobilizatsiia jariialaǵannan keiin prezident Vladimir Pýtin demalysqa ketken. Bul jóninde úsh derekkózge súiengen jýrnalist Farida Rýstamova júrgizetin Faridaily telegram-arnasy habarlady, dep jazady Azattyq.
Pýtin sońǵy ret jurt aldynda 21 qyrkúiekte Velikii Novgorodta sóilegen kezde kóringen. Rýstamovanyń derekkóziniń habarlaýynsha, kontsertten soń Pýtinde demalys bastalǵan. Ol keminde bir aptaǵa sozylady. Biraq telearnalar burynǵysha Pýtinniń qatysýymen ótken siýjetterdi kórsetip jatyr. Rýstamovanyń habarlaýynsha, bul baǵdarlamalar aldyn ala túsirilgen.
Bir derekkózdiń aitýynsha, Pýtin qazir Novgorod oblysynda Valdai rezidentsiiasynda demalyp jatyr. Bul sarai jóninde osyǵan deiin Aleksei Navalnyidyń jemqorlyqpen kúres qory jazǵan.
Kóptegen kommentatorlar Pýtinniń juma kúni Máskeýdegi referendýmdy (Ýkrainanyń keibir aýmaǵyn Reseige qosý týraly referendým, Ýkraina men Batys elderi ony zańsyz dep ataǵan) qoldaý kontsertine kelmegenine nazar aýdarady. Kremldiń baspasóz hatshysy Dmitrii Peskov Pýtinniń qoly timei jatqanyn habarlady. Ol sonymen birge Pýtinniń demalysta ekenin joqqa shyǵardy.
2022 jyly naýryzda Rýstamova Kremldegi derekkózderine súiene otyryp, Reseidiń Ýkrainaǵa basyp kirýinen Pýtinniń ainalasyndaǵy adamdar shoshyǵanyn, birneshe aptadan soń kóndigip, Pýtinniń ainalasyna qaita toptasqanyn jazdy.
Jýrnalistiń aitýynsha, Pýtin endi jurt aldyna 29 qyrkúiekte shyǵýy múmkin. Ol kezde onyń aimaqtarǵa sapary josparlanǵan. Ol ýaqytqa deiin "referendým" aiaqtalmaq.
Senbi kúni "RIA Novosti" agenttigi derekkózge súiene otyryp, 30 qyrkúiekte prezident Federaldyq jiynǵa joldaý jasaitynyn habarlaǵan. Konstitýtsiia boiynsha prezident mundai joldaýdy jylyna bir ret jasai alady, biyl ondai joldaý bolǵan joq. Boljam boiynsha, Pýtin referendým nátijesin habarlaýy múmkin. Buǵan deiin ol Ýkrainanyń tórt oblysyn Reseige qosýdy qoldaýǵa ázir ekenin meńzegen.
"Verstka" basylymy da derekkózge súienip, dál osy merzimdi aitady. Basylym sol kúni Ýkrainanyń birqatar aýmaǵyn Reseige qosý týraly kelisimge qol qoiylatynyn joqqa shyǵarmaidy.
Joldaýdyń merzimi resmi túrde aitylǵan joq.
