Biyl 15 jyldyǵyn atap ótken Facebook adamnyń kúndelikti ómiri men kommýnikatsiiasyn ózgertkeni belgili. Degenmen, bul áleýmettik jeliden bas tartsaq ne bolady? Amerikalyq ǵalymdar kólemdi zertteý júrgizip, osy suraqtyń jaýabyn izdegen eken.
«2,3 mlrd belsendi paidalanýshysy bar Facebook álemdegi eń iri áleýmettik jeli. 2,3 mlrd degenimiz - álem halqynyń shamamen úshten birine teń keledi. Ortasha eseppen ár adam Facebook pen oǵan tiesili Instagram men Messenger -de kúnine 50 minýt ýaqytyn ótkizedi», dep jazady The Guardian basylymy.
Ǵalymdardyń júrgizgen zertteýine qatysqan 1,2 myń adam Facebook akkaýntyn 1 jylǵa óshirý úshin 1-2 myń dollar tólem alýǵa kelisken. Al Stenford pen Niý-Iork ýniversitetiniń ǵalymdary sondai-aq akkaýnttaryn bir aiǵa óshirýge daiyn 2844 adamdy tapqan.
«Zertteýge qatysqandardyń barlyǵy 18 jastan asqandar. Olar Facebook áleýmettik jelisinde eń kemi on bes minýt ýaqyt ótkizip júrgen. Zertteý bastalmas buryn qatysýshylar saýalnama toltyryp, saiasi kózqarasy, kúndelikti ómiri men óziniń kóńil-kúii týraly málimetter bergen», dep jazady basylym.
Nátijesinde belgili bolǵandai, Facebook-ten bas tartqan adamdardyń saiasi saýaty tómendegen. Bul Facebook-tiń kóbine aqparat kózi retinde qoldanylatynyn kórsetse kerek. Sonymen qatar qatysýshylar Facebook joqta aqparat alý úshin gazet betin ashpaǵan.
«Qatysýshylarda kúnine bir saǵat bos ýaqyt paida boldy. Al Facebook-te belsendi adamdarda bul kórsetkish odan da kóp. Qatysýshylar oflainda otbasymen, dostarymen kóp ýaqyt ótkizgen. Zertteý nátijelerine sensek, Facebook-ten bas tartý adamnyń kóńil-kúiine jaqsy áser etken. Al zertteý bitken soń qatysýshylar Feisbýkti endi sirek qoldanatyndaryn aitqan. Degenmen, bir aptadan soń qatysýshylardyń 10%-y áleýmettik jelige kirmese, eki aidan soń bul kórsetkish 5%-dy quraǵan», dep jazady avtor.
