Búgin Senatta «Politsiianyń servistik modelin zańnamalyq qamtamasyz etý jáne QR IIM-in beiindi emes fýnktsiialardan bosatý» taqyrybyndaǵy Úkimet saǵatynda Ishki ister ministri Erlan Turǵymbaev vedomstvoda atqarylǵan jumysty baiandady, dep habarlaidy "Ult aqparat".
«Memleket basshysy quqyq qorǵaý organdarynyń jumysyna jańa talaptar qoidy. Ishki ister organdaryn reformalaýdy 2019 jyly Elbasy usyndy. Soǵan bailanysty arnaiy Jol kartasy qabyldandy. Birinshiden, ishki ister organdarynyń shtat sany 11 paiyzǵa qysqardy. Qajet emes 1483 basqarýshy laýazymdar joiyldy. Ekinshiden, politsiia servistik modelge kóshti. «Global Peace Index» reitingi boiynsha Qazaqstan qaýipsizdik jaǵynan 163 memleket arasynda 70-shi orynda. Al, Táýelsiz Memleketter Dostastyǵy elderi ishinde 1-shi oryn aldy», - dedi Turǵymbaev.
Onyń aitýynsha, saýalnama aiasynda azamattardyń 37 paiyzy politsiiaǵa tolyq, 38 paiyzy jartylai senetindigi anyqtaldy.
«Prezidenttiń tapsyrmasy boiynsha «halyqqa qulaq asatyn memleket» qaǵidasyn iske asyrý úshin azamattardy qabyldaý tártibi ózgerdi. Barlyq qala men aýdandarda 252 «Azamattardy qabyldaý» beketteri quryldy. Onda quqyqtyq jáne konsýltativti kómek beriledi. «Joldaǵy qabyldaý», «Aýladaǵy qabyldaý» aktsiialary turaqty túrde uiymdastyrylýda. 2020 jyly 361 myń konsýltatsiia berildi, 205 myń ótinish qaraldy. Áleýmettik jelilermen jumys kúsheitildi. Feisbýkte barlyq politsiia basshylarynyń jeke akkaýnttary ashyldy. Osy oraida aýdandyq basshylardan bastap departament basshylaryna deiin qamtyldy. Ýchaskelik inspektorlar turǵyndardyń chatyna qosyldy. Halyqqa kúnde aqparat berý úshin vedomstvalyq polisia.kz saity men telestýdiia iske qosyldy». – dedi Erlan Turǵymbaev.
