2020 jyldyń aiaǵyna deiin FlyArystan ushaqtary kúnine 72 reis jasaidy, dep habarlaidy "Ult aqparat" «Eir Astana» kompaniiasynyń Korporativtik kommýnikatsiialar jónindegi departamentine silteme jasap.
«QR Prezidentiniń Joldaýyna sáikes, áýe tasymalyn qoljetimdi etý úshin «Eir Astana» kompaniiasy FlyArystan jobasyn jetildire túspek. Ol úshin jyl sońyna deiin taǵy eki Airbus A320 lainerin satyp alamyz. Nátijesinde reisterdiń sany kúnine eki esege artady. 2020 jyldyń sońyna qarai FlyArystan ushaqtarynyń sanyn 10-ǵa jetkizý kózdelgen. Sonyń arqasynda kúndelikti reisterdiń sany 72-ge jetedi. Iaǵni, Qazaqstan ishinde ushý kestesi edáýir keńeitiledi. Iaǵni, óńirler arasynda áýe qatynasy damidy», - delingen kompaniia usynǵan aqparatta.
Korporativtik kommýnikatsiialar jónindegi departament mamandary suranysy joǵary baǵyttar boiynsha biletterdiń quny Eýropaǵa qaraǵanda 30 paiyzǵa qymbat bolýynyń sebebin de túsindirgen.
«Álemdegi barlyq áýe kompaniialary kerosin men injenerlik-tehnikalyq qyzmet kórsetýdiń, tehnika men qosalqy bólshekterdiń, áýejaidaǵy maman daiarlaý standarttarynyń qunynan shyǵyn shegedi. Bul rette Batys tehnikasyn paidalanatyn Qazaqstan áýe kompaniialary sheteldik básekelesteri siiaqty atalmysh shyǵyndardy sheteldik valiýtamen tóleidi», - delingen málimette.
«Eir Astana» áýe tasymalyndaǵy qazirgi baǵany túsirý úshin qabyldanýy tiis sharalardy da atady.
«Áýe tasymalynyń qunyn túsirý úshin aldymen Qazaqstan áýejailarynda tarifti kórsetiletin qyzmetterdiń artýyna qarai túsirý qajet. Al jolaýshy aǵyny báseń óńirlerde áýejai shyǵynynyń bir bóligi sýbsidiialanýy tiis.
Resei tájiribesine súiene otyryp, ishki reisterge salynatyn qosymsha qun salyǵyn alyp tastaý qajet. Bul bilet baǵasyn 12 paiyzǵa arzandatady. Qosymsha qun salyǵynyń alynýy Reseide óńiraralyq reisterdi jiiletip, aýmaǵyn keńeitip otyr», - delingen kompaniianyń aqparatynda.
