L.N.Gýmilev atyndaǵy Eýraziia ulttyq ýniversitetiniń stýdentteri birinshi bolyp joǵary shákirtaqy aldy, – dep habarlaidy JOO baspasóz qyzmeti.
Qazaqstan Prezidenti Qasym-Jomart Toqaev Jastar jylynyń jabylý saltanatynda 2020 jyldyń qańtar aiynan bastap stýdentterge, magistranttarǵa jáne doktoranttarǵa shákirtaqynyń 25%-ǵa artatynyn jariialaǵan bolatyn.
L.N. Gýmilev atyndaǵy Eýraziia ulttyq ýniversitetiniń 14 677 stýdenti jańa joǵarylatylǵan tólemderdi birinshi bolyp aldy (sáikesinshe, bakalavriatta oqityn stýdentter sany - 10 275, magistratýra – 2 795, doktorantýra - 997).
Bakalavriat stýdentterine arnalǵan shákirtaqy 20 949 teńgeden 26 186 teńgege, magistrlik baǵdarlamalar 53 530 teńgeden 66 913 teńgege, doktorantýra 81 998 teńgeden 102 498 teńgege deiin ósti. Qazir Eýraziia ulttyq ýniversitetinde 20 myńdai stýdent oqysa, olardyń 70 paiyzy memlekettik bilim granty iegeri.
«2019 jyldyń qyrkúiek aiynan bastap professor-oqytýshylar quramynyń jalaqysy 50 paiyzdan joǵary, al ǵylymi kitaphana qyzmetkerleriniń jalaqysy 20% -ǵa kóterilgenin atap ótken jón. Al ákimshilik jáne sala qyzmetkerleriniń jalaqysyn biylǵy jyldyń 1 qańtarynan 20% -ǵa arttyrý kózdelýde», delingen habarlamada.
