Qazaqstannyń koronovirýske qarsy sharalary ýaqytyly qabyldandy jáne durys boldy. Mundai pikirdi Eýropalyq parlamenttiń (EP) Ortalyq Aziia elderimen bailanys jónindegi delegatsiia basshysy, EP depýtaty Fýlvio Martýshello bildirdi, dep habarlaidy QazAqparat.
«Qazaqstanda koronavirýske qarsy kúreste qoldanylǵan sharalar ýaqytyly ári óte durys boldy. Qazaqstan epidemiiadan bir qadam alda júrip, onda Eýropanyń keibir elderinde biz kórip otyrǵan úrei týdyrarlyq saldardyń oryn alýyna jol berilmedi», - dedi eýrodepýtat QazAqparat agenttigine bergen suhbatynda.
«Engizilgen qatań, biraq qajetti shekteýler myńdaǵan qazaqstandyq azamattyń ómiri men densaýlyǵyn saqtap qalýǵa kómektesti. Tiisti sharalar densaýlyq saqtaý júiesine qysymdy tómendetýge, al dárigerlerdiń óz múmkindikterin arttyrýǵa múmkindik týǵyzdy», - dep qosty ol.
«Osy turǵydan sizdiń elińiz Dúniejúzilik densaýlyq saqtaý uiymynyń keńesterine sáikes áreket etýde. Jaqynda DDU Eýropalyq óńirlik biýrosynyń direktory Hans Kliýge koronavirýspen kúres júrgizýde Qazaqstandy úlgi etti», - dep atap ótti Martýshello.
«Mańyzdy taǵy bir tusy, Úkimet indettiń aldyn alýdyń preventivti sharalaryn qolǵa alyp, densaýlyq saqtaý júiesine jáne áleýmettik salany qoldaýǵa qomaqty resýrsyn bóldi. Al qazaqstandyqtardyń ózi jalpyǵa ortaq qaterge qarsy judyryqtai jumyldy», - dedi depýtat.
«Elde óńir úshin biregei bolyp tabylatyn biotehnologiialar men qaýipti infektsiialar salasyndaǵy ǵylymi mekemelerdiń bolýy qysqa merzim ishinde koronavirýske test-júielerdi jasap shyǵarýǵa, sondai-aq indetke qarsy vaktsina synaǵyn bastaýǵa múmkindik berdi. Osynyń barlyǵy qazaqstandyq biomeditsina salasynyń básekege joǵary qabilettiligin tanytyp otyr», - degen senimde ol.
«Koronavirýs týraly aita kele, Qazaqstannyń Eýropalyq odaqpen dástúrli dostyq qatynasy týraly sóz qozǵamasqa bolmas. Kez kelgen daǵdarys aiaqtalady jáne qazir EO men Qazaqstan arasyndaǵy qatynas nyǵaia túsetin keleshekke naǵyz kóz tastaityn ýaqyt», - dep atap ótti suhbattasýshy.
«Naýryz aiynda Eýropalyq odaq pen Qazaqstan Seriktestik jáne yntymaqtastyq týraly keńeitilgen kelisim tolyq kúshine engen soń qarym-qatynastyń jańa áserli bóliminiń betin ashty», - dep atap ótti ol.
«Kelisimniń óz kúshine engen sátinen biz onyń basymdyqtaryn tolyq paidalana alamyz – energetika jáne kólik salasynan bastap, klimat, bilim jáne ǵylym salasyndaǵy birlesken áreketterimizdi tereńdetip, jan-jaqty qoldana alamyz», - dep túiindedi sózin Fýlvio Martýshello.
