«Tulpar minip, tý alǵan» jobasy elden bólek, shet elde de qoldaýǵa ie bolyp kele jatyr. Bul joly Eýroparlament depýtaty Andrei Mamykin «Alpamys batyr» jyrynan úzindi oqyp, ulttyq jobaǵa ún qosty, dep habarlaidy QazAqparat tilshisi.
«Bul joly Latviia memleketiniń azamaty, Latviiadaǵy Eýroparlament depýtaty Andrei Mamykin «Alpamys batyr» jyrynan úzindi oqydy. Ol estafetany belgili qazaqstandyq jýrnalist Janat Ernstten alyp, QR Syrtqy ister ministriniń orynbasary Roman Vasilenkoǵa joldady», - delingen «Tulpar minip, tý alǵan» ulttyq jobasynyń Feisbýktegi paraqshasynda.
Eske sala ketsek, «Tulpar minip, tý alǵan» jobasy byltyr bastalyp, ulttyq jobaǵa halyqpen birge birqatar ministrler men oblys ákimderi, depýttattar ún qosqan bolatyn.
Jalpy, elimizde batyrlar jyryna degen betburys baiqalyp keledi. Qazaqstanda mektep oqýshylary arasyndaǵy «Tulpar minip, tý alǵan!» baiqaýyna 50 myń oqýshyny qatystyrý kózdelip otyrǵanyn buǵan deiin Aqparat jáne qoǵamdyq damý ministri Dáýren Abaev aitqan edi.
«Bul aýqymdy ári aǵartýshy joba. Ol jobaǵa biz elimizdiń barlyq óńirlerinen 50 myńnan astam oqýshyny tartýdy josparlap otyrmyz. Onyń maǵynasy - oqýshylar qazaqtyń «Qobylandy batyr» eposyn jattap qana qoimai, ony talqylap, qazaqtyń ertedegi sózderine túsinik bere alýy kerek. Bul baiqaýdy Jastar jylyna arnap otyrmyz. Qoǵamnyń keń nazaryna ie bolar degen senimimiz bar. Jobanyń finaldyq kezeńi - «Habar» telearnasynda telekúndelik jáne gala-kontsert formatynda ótedi», - degen edi ministr.
