Eýropalyq komissiia Prezidenti Ýrsýla fon der Liaien Eýropalyq odaqqa múshe barlyq el moiyndaǵan vaktsinatsiia týraly sertifikatty engizýdi jaqtap otyr, dep habarlaidy "Ult aqparat".
«Vaktsinatsiia týraly sertifikattyń bolýy mindetti túrde qajet. Bul - meditsinalyq qajettilik», - dedi Ý.Liaien Portýgaliia Premer-Ministri Antoniý Kostamen kezdesýden keiingi baspasóz máslihaty barysynda.
Degenmen, Ýrsýla fon der Liaien pikirtalastar barysynda mundai qujatty engizý kezinde adamnyń qandai quqyqtary zardap shegýi múmkin ekendigin talqylaý kerektigin aitty.
Qazirdiń ózinde EO-ǵa múshe birqatar memleket mundai «vaktsinatsiia tólqujatyn» engizý kemsitýshilik sharasyna ainalýy múmkindigin eskertken bolatyn. Óitkeni, mundai tólqujatqa ie azamat Eýropa elderin erkin saiahattaý múmkindigine bolsa, vaktsinatsiia alý kezeginde turǵandar ondai quqyqtan qaǵylady. Alaida odaqtyń keibir memleketi bul jobany týrizmdi jańǵyrtý jáne pandemiia kezinde elder arasynda saiahattaýshylardyń qozǵalysyn jeńildetý úshin ilgeriletip otyr.
«Barlyq ýaqytta ádil teńgerim tabýǵa bolady. Máselen, vaktsinatsiia almaǵandar úshin koronavirýsqa arnalǵan testiń teris nátijesin sertifikatpen biriktirýge bolar edi», - dep usynys jasady Ý.Liaien.
Aita keteiik, 21 qańtar kúni EO Úkimet basshylary beinekonferentsiia barysynda kezdesip, koronavirýs daǵdarysymen bailanysty sońǵy jaittardy jáne vaktsinatsiia tólqujatyn engizý múmkindikterin talqylaidy.
