Koronavirýs kóp taraǵan Eýropanyń tórt elinde sońǵy táýlikte SARS-CoV-2 infektsiiasynan kisi ólimi aitarlyqtai azaiǵan. Buryn bul kórsetkish boiynsha tórt el ózgelerden alda turǵan.
Frantsiiada bir táýlikte COVID-19-dan 242 adam ólgen, onyń 125-si aýrýhanada, 90-y qarttar úiinde qaitys bolǵan, dep habarlaidy Frantsiianyń densaýlyq saqtaý ministrligi. Bir kún buryn bul kórsetkish 369 adam bolǵan.
Italiiada sońǵy bir táýlikte koronavirýstan 260 adam ólgen. Bul 14 naýryzdan bergi eń tómen kórsetkish. Epidemiia bastalǵaly Italiiadada virýstan 26 644 adam ólgen. Ótken táýlikte 2324 adam aýrýhanaǵa túsken, bul da 20 naýryzdan bergi eń tómen kórsetkish dep habarlaidy RFI.
Ulybritaniia densaýlyq saqtaý departamenti 31 naýryzdan beri kisi óliminiń eń tómen kórsetkishin tirkedi. Ótken táýlikte Britaniia aýrýhanalarynda 413 adam ólgen. Epidemiiadan ólgender 20 732 adam. Alaida, «Nemetskaia volna» aqparatyna qaraǵanda, Ulybritaniiadaǵy shynaiy kórsetkishter ózgeshe bolýy múmkin. Óitkeni óz úileri men qarttar úiinde ólgender bul statistikaǵa kirmegen.
Ispaniiada koronavirýs juqtyrǵandardan sońǵy táýlikte 288 adam ólgen. Bir kún buryn, 25 sáýirde 378 adam ólgen. Epidemiia bastalǵaly 23 190 adam qaitys bolǵan.
Álemde barlyǵy 2 986 000 (+78 000, bir táýlik burynǵydan 19 paiyz az) adam koronavirýs juqtyrdy. Ólgender: 206 500 (+4000, bir táýlik burynǵydan 40 paiyz az). Jazylǵandar: 875 000 (+43 000, bir táýlik burynǵydan 20 paiyz az).
Koronavirýs dinamikasy jaily Djons Hopkins ýniversiteti jariialaityn kún saiynǵy esep – álemdegi eń egjei-tegjeili esep bolyp sanalady. Alaida, bul esep te úkimet organdarynyń málimeti boiynsha túziledi.
Kei elde koronavirýs jaily aqparattar jariialaýǵa shekteý qoiǵan nemese tolyq kartina jasaýǵa múmkindik bermeitin ózge de sebepteri bar. Málimetterdiń ashyqtyǵy men sapasy, ádisnamasy ár elde árqily bolýy múmkin.
