EQDB Qazaqstan ekonomikasynyń qalpyna kelý boiynsha ósý traektoriiasyna shyqqanyn atap ótti, dep habarlaidy "Ult aqparat" Premer Ministrdiń resmi saityna slteme jasap.
2021 jylǵa QR JIÓ ósý qarqyny boiynsha Eýropa qaita qurý jáne damý banki boljamdary 3,0%-dan 3,6%-ǵa deiin kóterildi. 2022 jyly jańartylǵan esep derekterine sáikes ósim 3,8%-dy quraidy.
Boljamdardy arttyrýdyń negizgi faktorlary naqty sektordaǵy, atap aitqanda, ekonomikanyń óńdeýshi salalaryndaǵy, qurylystaǵy jáne aýyl sharýashylyǵyndaǵy joǵary dinamika, kórsetiletin qyzmetter salasynyń jekelegen salalaryndaǵy belsendilikti arttyrý, ekonomikanyń óndirýshi emes salalaryndaǵy investitsiialyq qyzmetti qalpyna keltirý, sondai-aq álemdik shikizat naryqtaryndaǵy suranysty qalpyna keltirý boldy.
Qaita óńdeý sektorynda ósý qarqyny osy jyldyń 5 aiynyń nátijesi boiynsha mashina jasaýda (21,1%), onyń ishinde avtomobil jasaýda (26,4%) jáne lokomotivter men vagondardy qosa alǵanda ózge kólik quraldaryn óndirýde (54,9%), himiia ónerkásibinde (9,8%), jeńil ónerkásipte (5,5%), azyq-túlik ónimderin óndirýde (3,3%), metallýrgiiada (2,7%), farmatsevtikada (25,7%) jáne basqa salalardaǵy joǵary qarqyn esebinen 7,2% deńgeiinde qalyptasty. Qurylys sektorynda (11,3%) jáne aýyl sharýashylyǵynda (3,1%) joǵary ósý qarqyny baiqaldy.
EQDB sondai-aq qyzmet kórsetý salasynyń jekelegen salalaryndaǵy ósimdi atap kórsetedi. Atap aitqanda, biylǵy 5 aidyń qorytyndysy boiynsha qalpyna kelýdiń joǵary qarqyny saýdada (6,7%), bailanysta (11,6%), qarjy jáne saqtandyrý qyzmetinde (1,6%), jyljymaityn múlik operatsiialarynda (1,3%) baiqaldy. Negizgi kapitalǵa salynǵan investitsiialardyń ósýi taý-ken óndirisin esepke almaǵanda 25,5%-dy qurady.
EQDB aldaǵy kezeńderde QR ekonomikasy ósiminiń oń faktorlary retinde Úkimettiń ekonomikany fiskaldyq yntalandyrý jáne jeke suranysty qalpyna keltirý jónindegi sharalaryn da atap ótedi. EQDB álemdik jáne ulttyq ekonomikalardy qalpyna keltirýdegi negizgi syn-tegeýrin pandemiianyń qaitalaný yqtimaldyǵy dep sanaidy.
