Eýropanyń kóptegen eli 15 maýsymnan bastap shekarasyn ózge eýropalyqtarǵa ashqaly otyr. Bul - koronavirýs pandemiiasy bastalǵaly eń iri qadamdardyń biri.
Shekarasyn ashýǵa bel býǵan elder qatarynda Germaniia, Belgiia, Frantsiia, Gretsiia jáne Chehiia bar. Avstriia shekarasyn 16 maýsymnan ashady.
Bul qadam Eýropalyq komissiianyń ótken aptadaǵy usynysynan keiin jasalyp otyr. Ol kezde Eýropalyq komissiia shekaralardy meilinshe tezirek ashqan durys degen bolatyn.
Shekara ashylǵan soń júrip-turý múmkindigi negizinen Eýroodaq, Ulybritaniia jáne Eýropanyń Shengen vizasy júiesine qosylǵan ózge elderiniń azamattaryna beriledi.
Alaida elderdiń karantin sharalary ártúrli bolyp qala beredi. Al Eýropadan tysqary jatqan elderdiń azamattary qurlyqqa ázirshe kire almaidy.
Frantsiia prezidenti Emmanýel Makron 15 maýsymnan el ekonomikasy tolyq ashylatynyn aitty. Onyń aitýynsha, bul ekonomikany “qaita ot aldyrý úshin” kerek.
Frantsiia shekarasyn Eýropa elderine 15 maýsymnan, qalǵan elderge 1 shildeden ashýdy josparlap otyr.
Ispaniia úkimeti shekarasyn Eýropanyń kóptegen eline 21 maýsymda ashpaq. Dál sol kúni eldegi tótenshe jaǵdai aiaqtalady.
Eýropa - koronavirýstan eń qatty zardap shekken kontinent. Alaida sońǵy ýaqytta virýsty juqtyrý deńgeii báseńdep, ólim sany edáýir azaidy. Degenmen shekaranyń ashylýymen koronavirýs ekinshi tolqyny kelýi múmkin degen alańdaýshylyq bar.
Osy kúnge deiin koronavirýs 7,8 millionnan asa adamnan tabyldy. Qaitys bolǵandar 430 myńnan asty.
