Eýropalyq komissiia Mikaela Mýany óziniń tarihtaǵy birinshi násilshildikpen kúres boiynsha úilestirýshisi etip taǵaiyndady, dep habarlaidy "Ult aqparat".
Osylaisha, Eýrokomissiia EO-nyń násilshildikpen kúres boiynsha josparynda baiandalǵan mindetterin oryndaidy.
Óziniń jańa qyzmetinde Úilestirýshi násildik jáne etnostyq azshylyqpen tyǵyz qarym-qatynasta bolyp, olardyń alańdaýshylyqtaryn Komissiiaǵa jetkizip otyrady.
M. Mýa násilshildikpen kúres salasyndaǵy saiasi sharalardy kúsheitý úshin EO-nyń múshe elderimen, Eýropalyq parlamentpen, azamattyq qoǵammen jáne ǵylymi qaýymmen tyǵyz bailanysta jumys isteidi.
Násilshildikpen kúres boiynsha úilestirýshi násilshildikti boldyrmaý jáne onymen kúresý boiynsha saiasatty júzege asyrý úshin Eýrokomissiianyń basqa qyzmetterimen kúsh biriktiredi.
Teńdik máseleleri boiynsha komissar Helena Dali «Men Mýa hanymdy qýanyshpen qarsy alamyn. Onyń jumysy násilshildikpen kúres boiynsha jospardy júzege asyrýda mańyzdy bolmaq. Onyń taǵaiyndalýymen Komissiia antinásilshil Eýropalyq odaqty qurýǵa taǵy bir mańyzdy qadam jasaidy. Biz EO elderimen, azamattyq qoǵammen jáne ózge de múddeli taraptarmen tyǵyz qarym-qatynas jasap, násilshildikpen kúres boiynsha kúshimizdi biriktirýge niet etip otyrmyz».
Mýa hanym halyqaralyq damýdy meńgerip, odan keiin óz eli Finliandiiada násilshildik jáne kemsitýshilikpen kúresetin ÚEU-larda jetekshi qyzmetterde boldy. Sońǵy birneshe jyl ol Finliandiianyń Ádilet ministrliginde jumys istegen. Onyń násilshildik pen etnostyq belgiler boiynsha kemsitýshilik, sonymen qatar etnostyq birdei jáne ártúrli qoǵamdy ilgeriletý boiynsha mol bilimi men tájiribesi bar.
