QR Sybailas jemqorlyqqa qarsy is-qimyl agenttiginiń tóraǵasy Oljas Bektenov Ortalyq Aziia boiynsha arnaiy ókil Teri Hakal bastaǵan Eýroodaq delegatsiiasymen kezdesti, dep habarlaidy "Ult aqparat" vedomstvonyń baspasóz qyzmetine silteme jasap.
"Kezdesý barysynda Antikor basshysy 2022-2026 jyldarǵa arnalǵan sybailas jemqorlyqqa qarsy saiasat Tujyrymdamasynyń negizgi baǵyttarymen tanystyrdy. Sondai-aq, taraptar zańsyz baiý úshin zańnamalyq jaýapkershilikti engizý jáne kirister men shyǵystardy jalpyǵa birdei deklaratsiialaý máselelerin talqylady. Biznesti qorǵaý máseleleri de sóz boldy.
Eýropalyq áriptester eldiń sybailas jemqorlyqqa qarsy saiasatynyń ekpinin oń baǵalap, GREKOnyń Halyqaralyq sybailas jemqorlyqqa qarsy standarttary men ozyq tájiribelerine sáikestigine umtylysyn atap ótti.
Damýdyń mańyzdy vektory Qazaqstannyń sybailas jemqorlyq úshin qylmystyq jaýapkershilik týraly Eýropa Keńesiniń Konventsiiasyna qosylýǵa daiyndyǵy atap ótildi" - delingen habarlamada.
Esterińizge sala keteiik, tiisti shaqyrý osy jyldyń 1 shildesinde kelip tústi.
«Agenttiktiń eýropalyq seriktestermen ózara is-qimyl máselelerinde ashyqtyǵy men daiyndyǵyn erekshe atap ótkim keledi. Biz óz tarapymyzdan Qazaqstannan Eýropaǵa shyǵarylǵan aktivterdi qaitarý týraly suranystarǵa qoldaý kórsetýge daiynbyz», - dedi T. Hakala.
Pikirtalastyń jeke taqyryby qańtar oqiǵalaryna bailanysty azaptaý týraly málimdemelerge qatysty isterdi tergeý boldy.
«Qazirgi ýaqytta 171 is aiaqtaldy. 177 is boiynsha tergeý jalǵasýda. Stambýl hattamasynyń barlyq talaptary saqtalyp jatyr», - dedi Bektenov.
