Chehiiadaǵy Temelin atom elektr stantsiiasy
Evrokomissiia gaz jáne atom qýatyn belgili bir jaǵdaida "jasyl energiia" dep sanaýdy usynady. Qujat jobasy Eýropa odaǵyna múshe elderge joldandy, - dep habarlaidy germaniialyq dpa agenttigi men Financial Times basylymy.
Odaqtyń uzaqmerzimdi qarjylandyrý baǵdarlamasy aiasynda jasalǵan bul usynys qyzý tartys týǵyzady dep boljaidy dpa. Eýropa odaǵy elderinde energiianyń bul túrlerine degen kózqara ártúrli.
Gaz energiiasyn qoldaityndar onyń kómirge qaraǵanda tazaraq ekenin aitsa, atom energiiasyn jaqtaityndar ol kómirqyshqyl gazyn bólmeidi degen ýájdi alǵa tartady.
Usynysqa qaraǵanda, 2030 jyldan keiin salynǵan jaǵdaida tabiǵi gaz tutynatyn elektr stantsiialarynyń jumysy parnik gazyn shyǵarýǵa bailanysty qatań shekteýli bolmaq. Atom jobalary, eger stantsiia qurylysyna ruqsat 2045 jylǵa deiin alynatyn bolsa, jasyl energiia dep sanalmaq.
Al qarsy taraptyń óz ýáji bar. Olar gazben jumys isteitin stantsiialardy "taza" deýge kelmeitinin, al atom energiiasynyń qaýipti qaldyǵyn joiýǵa týra keletinin jáne apat bolý qateri baryn eskertedi.
Atom energiiasyna qarsylardyń biri – Germaniia. Eýropa odaǵyndaǵy ekonomikasy jaǵynan bárinen alda turǵan bul elde 31 jeltoqsanda alty atom elektr staniiasynyń úsheýi jabyldy. Qalǵan úsheýin biylǵy jyldyń aiaǵyna deiin jabý jospary bar.
Al ekonomikasy boiynsha ekinshi orynda turǵan Frantsiia elektr qýatynyń 70 paiyzyn atom elektr stantsiialarynda óndiredi. Buǵan deiin 20 jyldai buryn jańa AES-ti iske qosqan bul el taǵy da sondai nysan salýdy josparlap otyr.
Eger Eýropa odaǵyna múshe elderdiń jartysynan kóbi, iaǵni 27 úkimettiń keminde 20-sy, basqasha aitqanda, odaq halqynyń keminde 65 paiyzy, nemese Eýroparlamenttiń 705 depýtatynyń 353-i qarsy bolsa, Eýrokomissiia usynysy qabyldanbaýy múmkin.
Al Qazaqstanda bilik ókilderi atom elektr stantsiiasyn salý jaily jii aityp júr. Sheneýnikter onyń sebebin elde elektr qýaty tapshylyǵy sezilip otyrǵanymen túsindiredi.
